Sulmi ndaj naftës Saudite, Franca, Gjermania dhe SHBA-të zyrtarisht akuzojnë Iranin

Franca, Gjermania dhe SHBA-të edhe zyrtarisht e fajësuan Iranin për një sulm ndaj naftës Saudite.

“Është e qartë, Irani është përgjegjësi i vetëm për këtë sulm. Nuk ka asnjë shpjegim tjetër të arsyeshëm. Ne mbështesim hetimet në vazhdim për detaje të plota”, thanë të tre qeveritë në një deklaratë të përbashkët.

Ata gjithashtu dënuan sulmin e 14 shtatorit, në të cilin dronë të armatosur dhe raketa u raportuan se u përdorën kundër pikave të drejtuara nga ndërmarrja shtetërore e naftës Saudi Aramco dhe riafirmuan solidaritetin e tyre me Arabinë Saudite dhe popullin e saj.

“Këto sulme mund të kenë qenë kundër Arabisë Saudite, por ato shqetësojnë të gjitha vendet dhe rrisin rrezikun e një konflikti të madh… Sulmet gjithashtu theksojnë domosdoshmërinë e de-përshkallëzimit përmes përpjekjeve të qëndrueshme diplomatike dhe angazhimit me të gjitha palët”, shtuan ata.

Deklarata gjithashtu theksoi se Irani duhet të pranojë negociatat për programin e tij bërthamor dhe çështjet e sigurisë rajonale.

“Të vetëdijshëm për rëndësinë e përpjekjeve kolektive për të garantuar stabilitetin dhe sigurinë rajonale, ne ritheksojmë bindjen tonë se ka ardhur koha që Irani të pranojë negociatat me një kornizë afatgjatë për programin e tij bërthamor, si dhe për çështje që lidhen me sigurinë rajonale, përfshirë programin e raketave”.

Ata gjithashtu i kërkuan Iranit që të përmbahet nga “provokimi dhe përshkallëzimi” i mëtejshëm.

Disa dronë goditën dy njësi Aramco në veri të Arabisë Saudite në sulmin i cili u mor përsipër nga rebelët Houthi të Jemenit.

Që nga viti 2015, koalicioni i udhëhequr nga Sauditët po luftojnë me Houthi-të e mbështetur nga Irani në Jemen. Mijëra jemenas kanë humbur jetën dhe i gjithë populli është në krizën më të keqe të urisë që është shënuar ndonjëherë. /tesheshi.com/