Kanë plasur reagime të mëdha pas sulmit me koktej molotovi të bërë ndaj konsullatës turke në qytetin e Prizrenit.
Përveç reagimeve të ashpra nga institucionet e vendit, po ashtu kanë reaguar edhe ambasada të huaja që gjenden në Kosovë.
Ambasadorja turke: Ngjarje pikëlluese
Ambasadorja turke, Kivilcim Kiliç, në një konferencë për media të organizuar së bashku me konsullen e Konsullatës së përgjithshme të Republikës së Turqisë në Prizren Selen Evxhit, tha se sulmi në konsullatën e Turqisë me koktej molotovi është një ngjarje që e ka pikëlluar.
Ajo si ngushëllim dhe si lajm të mirë e përmendi faktin se ngjarja ka kaluar pa të lënduar.
“Në objektin e konsullatës ka pasur dëme të vogla materiale, disa xhama të thyer dhe gjëra të tjera. Qoftë e kaluar për të gjithë. Pas aktit menjëherë policia e Kosovës dhe prokuroria shumë shpejtë i kanë filluar procedurat e hetimeve. Falënderojmë institucionet e Kosovës të cilat kanë qenë shumë serioze dhe kanë vepruar me përgjegjësi”, tha ambasadorja Kiliç.
Ajo e vlerësoi edhe qasjen e Ministrisë së Jashtme me të cilën ajo kishte kontaktuar me të marr informacionin.
“Kam biseduar me ministrin e Punëve të Jashtme, Enver Hoxhaj, i cili ka shprehur keqardhje dhe më ka më ka njoftuar se janë ndaluar 5 persona të cilët e kanë pranuar kryerjen e veprës. Janë pesë të arrestuar dhe procedura penale ndaj tyre po vazhdon”, tha Kiliç.
Ambasadorja i ka vlerësuar historike raportet mes dy vendeve, duke thënë se akte të këtilla mund të ndodhin kudo në botë.
Edhe konsullja Selen Evxhit falënderoi institucionet e Kosovës për reagimin e menjëhershëm, dhe tha se ajo mbi bazën e incizimeve të kamerave të konsullatës janë identifikuar dhe ndaluar dhe ndaj tyre do të zhvillohen procedurat e rregullta.
“Neve s’na mbetet gjë tjetër, pos që t’i shtojmë masat e sigurisë!” tha Evxhit.
Ambasadori britanik: Autorët të dalin para drejtësisë
Sulmin e ka dënuar edhe ambasadori britanik në Prishtinë, Ruairí O’Connell, i cili tha se ai solidarizohet me miqt në Turqi.
“E dënoj ashpër sulmin ndaj Konsullatës Turke në Prizren në orët e hershme të mëngjesit të sotëm. Ndihem i lehtësuar që askush nuk u lëndua. Solidarizohemi me miqtë dhe aleatët tanë turq. Ne besojmë që autoritetet e Kosovës do të marrin masa për të siguruar që autorët e krimit të sillen para drejtësisë”, ka shkruar ambasadori i Britanisë së Madhe në facebook.
Sulmin ndaj konsullatës turke në Prizren e kanë dënuar edhe presidenti Hashim Thaçi, qeveria e Kosovës, Ministria e Punëve të Jashtme si dhe partia e Drejtësisë.
Lajmi i sotëm për sulm ndaj Konsullatës turke në Prizren me koktej molotovi, është pasqyruar edhe në mediat ndërkombëtare.
Mediat në Turqi, siç është agjencia e lajmeve Anadolu, ka cituar mediat kosovare dhe kryeprokurorin e Prizrenit, Sylë Hoxha, se pesë persona janë arrestuar për këtë sulm.
Agjencia turke e lajmeve, po ashtu thotë se Ministria e Punëve të Jashtme të Kosovës e ka dënuar këtë akt.
Në këtë tekst të Anadolu Kosovës i referohet si “ish provincë e Serbisë”.
Për rastin në fjalë ka raportuar edhe Associeted Press dhe media tjera tjera të huaja.
Ndryshe, sulmi me koktej molotovi ndaj konsullatës turke në Prizren ndodhi pak orë pasi në këtë qytet ishin vendosur famujt e Turqisë, krahas atij të Shqipërisë, për nder të 28 Nëntorit – Ditës së Flamurit Kombëtar.
Përgatiti: Nga Blendi Gashi – /tesheshi.com/
