Javën e shkuar. komuniteti LGBT ka dërguar në Kuvend një draft ligj që parashikon ndryshimin e Kodit të Familjes.
Sipas draftit, duhet të shtohet në kod që përveç gjinisë mashkullore dhe femërore, pra siç është krijuar nga Zoti, të shtohet edhe një tjetër gjini, e ashtuquajtur “asnjëanëse”.
Sipas LGBT-së, gjinia duhet të zgjidhet vetë nga personi dhe jo të jetë ashtu siç është krijuar.
Ky draft-ligj i hap rrugën ndryshimit epokal të familjes shqiptare që formohet nëpërmjet një burri dhe një gruaje, për të patur edhe familje mikse nga persona të gjinisë së njëjtë.
Fillimisht ky ligj është kundërshtuar fuqimisht nga komunitetet fetare në vend.
Në një prononcim për Top Channel, përfaqësuesit e tre komuniteteve religjioze kryesore, atij Musliman, ai Ortodoks dhe Katolik e kanë kundërshtuar draftin.
Madje Milto Çako nga komuniteti ortodoks shkoi edhe më tej kur tha se “ka njerëz me pushtet që kanë devijuar dhe duan të imponojnë këto ndryshime”.
Po cilat janë rrugët që ky draft të bëhet ligj?
Në fillim projekti i dërguar nga LGBT-ja duhet të kalojë nga “namuzi” i Gramoz Ruçit, kryetari i Kuvendit. Ruçi duhet të japë viston i pari që ta kalojë projektin në procedurat e rregullta parlamentare.
A do ta kalojë Ruçi, një projekt të tillë, kur ai vetë ka dhënë imazhin e një burri alla qëmoti me namuz? Por edhe nëse kryeparlamentari e kalon draftin në procedura, nuk do të thotë se ai ka marrë “dritën jeshile”.
Do të jetë komisioni i Çështjeve Sociale i cili duhet ta shqyrtojë dhe ta çojë për verifikim juridik në komisionin e Ligjeve. Pra janë dy komisione të rëndësishme, ku në njërin është kryeta është Petrit Vasili, nr.1 i deputetëve të LSI-së dhe në tjetrin Ulsi Manja.
Komisioni i Vasilit duhet të vendosë nëse ka bazë apo vullnet për të hapur një diskutim të tillë, që nuk mund të bëhet sa hap e mbyll sytë në një mbledhje të thjeshtë, por duhet të nisë nga e para një diskutim bazik me pjesë të rëndësishme të shoqërisë, të cilat familjen e kanë si temë thelbësore. Pra Vasili do të duhet të thërrasë të gjithë ata që kanë një qëndrim kundër ndryshimit si parim.
Nëse komisioni i Çështjeve sociale pranon ta hedhë në diskutim, drafti duhet të kalojë në komisionin e Ligjeve për të parë a është në përputhje me Kushtetutën, e cila sanksionon familjen tradicionale. Megjithatë, nëse mund të gjendet një artific, edhe pse i vështirë të gjendet, atëherë do të duhet që ta kalojnë në seancë plenare. Pra në duart e deputetëve.
Por që të votohet, ky ndryshim i Kodit të Familjes kërkon 84 vota, pra patjetër që përfshin në proces edhe qeverinë, e në radhë të parë Partinë Demokratike, e cila si një forcë e vetëquajtur e djathtë i takon që të mbron fort të drejtat konservatore. Dhe kësaj radha ajo do jetë vërtet para para provës së madhe të profilit të saj ideologjik. Deri më sot, zyrtarisht ajo nuk ka mbajtur qëndrim ndaj LGBT-së dhe lëizjeve të saj, ku vetëm ca zëra të brendshëm kanë reaguar.
Shkurt drafti i paraqitur nga LGBT, pavarësisht se u tentua të kalojë pa zhurmë, ai nuk mund të miratohet “fët e fët”, edhe sikur të ketë një vullnet politik nga qeveria për shembull.
Do të duhet të vihen në provë shumë aktorë. Dhe nuk është provë e lehtë. Kujtojmë se njëri prej tyre, individualisht, Ylli Manjani, u dorëzua shpejt.
Nga ana tjetër është qeveria. A do mundet ajo të marrë në konsideratë, edhe në pikëpamjen elektorale, sensitetet e publikut? A do ia pranojë vetes dhe këtë kosto të rëndë. Vetë Rama si prononcim më të fundit lidhur me martesat e së njëjtës gjini, ka një “Jo” të rafinuar. Pak vite më parë ai do shprehej në një intervistë pak a shumë se “Shqipëria nuk e ka kohën për të diskutuar gjëra të tilla”. Dhe tani është prova e madhe… /tesheshi.com/
