Drejtuesi i Federatës Tuniziane të Hoteleve e ka përshkruar si të vështirë situatën e turizmit në vend pas sulmeve të përgjakshme në mars dhe në qershor të këtij viti ndaj turistëve të huaj.
Me rezervime jo më shumë se 20 për qind, 70 hotele kanë mbyllur dyert që nga shtatori, e më shumë hotele pritet të bëjnë të njëjtën gjë, ka treguar Ben Salah për një radio vendase.
Sektori i turizmit në Tunizi kontribuon me 10 për qind të prodhimit të përgjithshëm vendas, e punëson në mënyrë të drejtpërdrejtë a të tërthortë mbi 400.000 njerëz.
Por ky sektor ka marrë tatëpjetën që pas dy sulmeve ndaj turistëve të huaj, që lanë 60 të vdekur. Njëri prej tyre u krye në marsin e këtij viti në kryeqytetin e vendit, në muzeun kombëtar, ku mbetën të vrarë 22 persona, ndërsa tjetri pasoi në qershor, në një qytet bregdetar, si pasojë e të cilit u vranë 38 pushues, 30 nga të cilët ishin britanikë.
Numri i vizitorëve nga Europa është përgjysmuar që nga janari, dhe hotelet ndërkombëtare planifikojnë të mbyllen në pjesën më të madhe gjatë dimrit.
Industria tuniziane e turizmit u mbështet gjatë kësaj vere te pushuesit vendas e ata rajonalë, përgjithësisht nga Algjeria.
Ekonomia tuniziane është në amulli prej revoltës popullore të 2011-ës, dhe rritja ekonomike për këtë vit parashikohet të jetë vetëm 0.5 për qind. /tesheshi.com/
