Ka nisur një frenezi përpara kohe për të “kërkuar kokën” politike të Lulzim Bashës, ndërkohë që ende nuk janë numëruar as 50% të votave në rang kombëtar.
E gjitha kjo bëhet pikërisht para vizitës së zyrtarit të lartë të DASH-it, Hoyt Yee, i cili sot viziton Kosovën dhe që pritet të vijë edhe në Shqipëri.
Shtyrja e vizitës së zotit Yee në Tiranë është bërë pikërisht që të mos ndikonte politikisht para votimeve.
Zyrtari i lartë i DASH-it,vjen këtë herë me një emërim të posaçëm nga Presidenti i SHBA-së, Donald Trump, i cili e dërgoi në fillim në Serbi në inagurimin e Vuçiç.
Në Tiranë, Hoyt Yee pritet të imponojë një pakt të rëndësishëm reformash mes PD-së dhe PS-së që pritet të konkretizohen në radhë të parë me reformën në drejtësi, e më pas me reformën kushtetuese.
PD pritet të marrë disa institucione të rëndësishme kontrolli, duke nisur nga kryetari i Parlamentit.
Por nuk është çudi që të flitet edhe për Presidencën, pas luhatjes së Ilir Metës.
Megjithatë gjithçka do të varet nga qëndrimi i SHBA-së, sidomos tani që me fitoren e Ramës rrezikohet që Gjykata Kushtetuese të ndërmarrë një veprim “kundrapedal” që mund të rrezikojë ligjin e vetingut.
SHBA duket se do të vijë të vendosë në vend autoritetin ndërkombëtar që reforma në drejtësi nuk duhet as të ndalohet e as të kthehet mbrapsht.
Me rezultatin aktual, ku opozita reale që ka dalë nga kutitë është Sali Berisha dhe Ilir Meta, druhet se mund të formohet një pol i fortë opozitar kundër zbatimit të plotë të vetingut, apo që ta dobësojnë filtrin ndaj gjyqtarëve dhe prokurorëve, i cili më pas do të sjellë ngritjen e institucioneve të reja të drejtësisë.
Është shumë e rëndësishme panorama e dalë nga kutitë e 25 qershorit që vërtetë kanë forcuar Edi Ramën por kanë dobësuar Lulzim Bashën, garancinë e tij për vazhdimin e reformave të mëdha.
Zgjedhjet kanë forcuar apo ndoshta ruajtën pozicionin e Ilir Metës, duke e pozicionuar jo vetëm si një opozitë ndaj Edi Ramës, por dhe si një barrikadë e mundshme të reformës në drejtësi.
Largimi i Lulzim Bashës mund të ndikojë shumë tek rrjedha e mëtejshme e reformës në drejtësi dhe rikthejë në komisionet e vetingut në Parlament pikërisht skifterët apo kundërshtuesit e procesit. Realisht “skifterët” janë, pasi bëhet fjalë për Flamur Nokën dhe Gent Strazimirin që janë përkrahës së Berishës, por tashmë urdhërat që vijnë nga selia blu mund të ishin dramatikë.
Ndaj ka shumë rëndësi vizita e zyrtarit të lartë të SHBA-së, i cili do të ndajë “pikat mbi i” për fatin e reformës në drejtësi, kryeprourorin e ri, kryeprokurorin special etj.
Adriatik Llallës i mbaron mandati pikërisht muajin e ardhshëm…/tesheshi.com/
