Më shumë se 700 sulme me acid u regjistruan në Angli dhe Uells vitin e kaluar, krahasuar me 421 në vitin 2021, sipas Acid Survivors Trust International (ASTI). Incidentet e sulmeve me acid u rritën me 69% vitin e kaluar dhe viktimat femra tejkaluan viktimat meshkuj për herë të parë. Kostoja totale ekonomike e të gjitha sulmeve në vitin 2022 ishte mbi 44 milionë funte, që është afërsisht 52 milionë euro.
Fotografi kryesor britanik i modës Rankin ka krijuar një “Look Book”, udhëzues thelbësor i industrisë së modës për stilet dhe pëlhurat më të fundit, duke përdorur si modele shkrimtaren e mbijetuar të sulmit me acid, Patricia Lefranc.
Libri “Tear Couture Look” synon të nxjerrë në pah efektet shkatërruese të sulmeve me acid, dhe në veçanti lidhjen e tij me industrinë e modës, tekstilit, shitjes me pakicë dhe prodhimit.
Ai rrit ndërgjegjësimin për çështjet që lidhen me sulmet me acid në një format libri. Me një parathënie nga patronja e bamirësisë, Princesha Anne (motra e mbretit Charles), libri tregon historinë personale të Patricia Lefranc përmes mesazheve prekëse, të ilustruara me portrete nga Rankin.
“Kjo fushatë është gjithashtu shumë e rëndësishme për mua, sepse nuk e kisha idenë që industria e modës dhe acidet që ne përdorim brenda saj ishin kaq të lidhura me sulmet me acid”, tha Rankin.
“Kështu që unë iu afrova vërtet kësaj fushate siç bëj gjithmonë në bashkëpunim me subjektin tim dhe ishte shumë e rëndësishme për mua të tregoja se çfarë do të thotë sulm me acid”.
Modelja e Rankin, Patricia LeFranc, 59 vjeçe, është nga Belgjika, shkrimtare, e cila u sulmua nga ish-i dashuri i saj Richard Remes në vitin 2009. Pas sulmit, Lefranc ra në koma për tre muaj dhe u desh të qëndronte në spital gjithsej nëntë muaj.
Patricia LeFranc, duke u përpjekur të shpjegojë se si e gjeti guximin për ta bërë këtë, tha: “Gjëta guximin, pa dyshim, sepse në jetën time të mëparshme, tashmë isha një grua që e kisha, nuk kam qëndruar kurrë boshe. Nuk e dija kurrë se kjo tentativë për vrasje me acid do të ishte një betejë e madhe, sepse unë nuk jam e vetmja në botë. E kisha të vështirë ta bëja, por duhej ta bëja edhe për të gjitha femrat e tjera, sepse e shohim shpesh fytyrën. Unë me të vërtetë shpresoj që libri të jetë jashtëzakonisht i suksesshëm”, tha ajo. /tesheshi.com/
