Sulmet ajrore të NATO-s u marrin jetën 18 civilëve në Afganistan

Sipas një hetimi e një deklarate të OKB-së një ditë më parë, të enjten e të premten e shkuar janë vrarë 18 civilë në provincën Helmand të Afganistanit.

Civilët, më së shumti gra e fëmijë, janë vrarë nga sulmet ajrore të NATO-s, lë të kuptohet hetimi i Organizatës së Kombeve të Bashkuara.

Organizmi botëror thotë se sulmet ajrore janë kryer nga forcat ndërkombëtare ushtarake, por, duke iu referuar zyrtarëve ushtarakë amerikanë, vetëm avionët luftarakë të SHBA-së kanë qenë pjesë e sulmeve të fundit.

Zyrtarë të tjerë ushtarakë amerikanë, bën me dije Al Jazeera, kanë pohuar se avionët e tyre luftarakë kanë kryer rreth 30 sulme ajrore javën e shkuar në provincën afgane të Helmandit.

Një shifër ndryshe japin zyrtarët dhe banorët lokalë, që flasin për 22 civilë të vrarë nga sulmet e përbashkëta të forcave amerikane dhe afgane.

Misioni ushtarak i udhëhequr nga NATO-ja ka dislokuar qindra trupa në Helmand për t’u ardhur në ndihmë forcave afgane në përballjen ndaj luftëtarëve talibanë.

Raporti më i fundit i OKB-së flet për rritje dramatike të viktimave civile gjatë vitit të fundit nga sulmet ajrore afgane dhe amerikane. Më e pakta 891 civilë janë vrarë ose janë plagosur në 2016-n. /tesheshi.com/