Agjencia e lajmeve AFP bën me dije se më së paku 33 persona janë vrarë nga një sulm ajror i koalicionit të udhëhequr nga SHBA-ja mbi një shkollë që shërbente si strehë për të zhvendosurit pranë një qyteze siriane nën kontrollin e militantëve.
Observatori Sirian për të Drejtat e Njeriut hodhi gjithashtu dritë mbi ngjarjen, duke pohuar se sulmi mbi një qytezë të kontrolluar nga ISIS-i, el-Mensura, në provincën veriore të Rakkasë, ndodhi në orët e para të së martës. Shkolla e goditur gjendet 30 kilometra në perëndim të Rakkasë.
Drejtuesi i Observatorit, Rami Abdel Rahman, e konfirmoi lajmin për 33 persona të vrarë, e që ishin civilë të zhvendosur nga Rakkaja, nga Halepi dhe Homsi.
Vetëm dy persona janë nxjerrë deri tani të gjallë, i tha Abdel Rahman AFP-së.
Më herët gjatë këtij muaji, koalicioni pranoi se sulmet mbi Siri dhe Irak kishin lënë të vrarë aksidentalisht më e pakta 220 civilë. Grupe të ndryshme monitoruese raportojnë një numër më të madh viktimash civile. /tesheshi.com/
