Përkundër thirrjes së kancelarit austriak, Christian Kern, për t’u dhënë fund negociatave për anëtarësim të Turqisë me BE-në, ka një sërë deklaratash të udhëheqësve europianë që nuk janë në një linjë me kërkesën e tij.
Kështu, ministrja e Jashtme e Suedisë, Margot Wallstrom, e thotë hapur se vendi i saj vazhdon ta mbështesë kërkesën për anëtarësim të Turqisë në Bashkimin Europian.
Ajo deklaron se Suedia është në anën e vijimit të dialogut me Turqinë.
“Ne vazhdojmë ta mbështesim anëtarësinë e Turqisë në BE,” ka thënë ajo në një intervistë për gazetën suedeze Expressen.
Më herët ishte shefi i Komisionit Europian, Jean-Claude Juncker, që do të reagonte negativisht ndaj thirrjes austriake, duke paralajmëruar se ndërprerja e negociatave me Turqinë do të qe një gabim i rëndë i politikës së jashtme. /tesheshi.com/
