Ndërsa vala e refugjatëve nga vendet e Lindjes së Mesme e të Afrikës ka nxjerrë në pah qëndrime e sjellje të ndryshme ndaj tyre në vendet europiane, Suedia, jashtë vëmendjes mediatike, është treguar më bujare ndaj të vuajturve të shpërngulur prej tokës së tyre.
Al Jazeera i ka kushtuar një reportazh kësaj çfarë nënvizuam më sipër, e ka zhvilluar një intervistë me kryeministrin e vendit, i cili përtej ftohtësisë së perceptuar skandinave, reflekton ngrohtësi e dhembshuri.
Ndërkohë që kriza e refugjatëve në Europë vijon të thellohet, thotë mes të tjerash rrjeti gjigand informativ, shtetet anëtare të BE-së mbeten të ndara mbi mënyrën e përgjigjes ndaj numrit në rritje të njerëzve që arrijnë nga vendet e rrënuara prej luftës, si Siria dhe Afganistani.
Kështu, qeveria e djathtë hungareze është përballur me kritikat ndërkombëtare për përplasjet e fundit mes policisë hungareze dhe refugjatëve që kërkojnë të hyjnë në Hungari nga Serbia.
Suedia, vazhdon më tej Al Jazeera, është një nga vendet e pakta europiane që ka zgjedhur një qasje të kundërt. Zyrtarët suedezë të emigracionit u vendosën në stacionet e trenave, duke pritur e përshëndetur ardhjen e refugjatëve.
Pavarësisht faktit se 10.000 personave u është mohuar azili në Suedi, një numër i madh janë akoma në vend, duke i shpëtuar dëbimit.
Kjo po krijon tablonë e një politike të dyerve të hapura, dhe numrat duket se e mbështesin këtë. Al Jazeera i mëshon një të dhëne interesante, asaj se asnjë vend tjetër europian nuk po pret më shumë emigrantë për frymë se Suedia, madje as Gjermania.
“Eshtë një parim moral,”shprehet kryeministri suedez, Stefan Lofven, i intervistuar prej Al Jazeera-s, “e në të njëjtën kohë ne jemi të obliguar nga konventat ndërkombëtare. Çdo individ ka të drejtë të kërkojë azil në Suedi. Ne nuk mund t’i ndalojmë njerëzit të kenë një mundësi për të kërkuar azil nëse kanë nevojë. Ne nuk po i mbyllim kufijtë tanë për refugjatët… por duhet të kemi kontroll mbi to.”
Ai e ashpërson gjuhën kur vjen puna te incidentet e ndodhura me refugjatët në një pjesë të vendeve europiane. “Gaz lotsjellës dhe sulmimi i individëve në atë mënyrë – kjo nuk është Europa ime. Këto nuk janë vlerat europiane, dhe, sigurisht, jo thëniet, siç bëri kryeministri në Hungari, se ‘disa janë të mirëpritur, por jo muslimanët’. Kjo nuk është Europë. Ne duhet t’i mbrojmë vlerat europiane. Rregull në kufijtë tanë, po, kontroll, po, por njerëzit që po largohen për jetët e tyre duhet të gjejnë vend në Europë, dhe ata e kanë këtë të drejtë.”
Pritja e refugjatëve në Suedi është një model që duhet ndjekur, posaçërisht nga ato vende ku ardhja e refugjatëve është shoqëruar pareshtur me një mijë pakënaqësi të shprehura në forma të ndryshme, kurse fjalët e kryeministrit suedez reflektojnë qenien e tij një shtetar i denjë.
Përgatiti: Bujar M. Hoxha – /tesheshi.com/
