Shkodra i “ka shpëtuar” një tjetër ngjarjeje të rëndë, e cila do futej te vrasjet e bujshme të vitit të fundit në këtë qytet.
Suad Licit, administratorit të klubit “Vllaznia”, një figurë e njohur në këtë qytet si biznesmen, i është vënë tritol poshtë automjetit, por që për fat është diktuar prej tij.
Kanë qenë orët e para të mëngjesit kur ai i është drejtuar automjetit të parkuar pranë shtëpisë e njëherësh stadiumit, e ku ka dalluar “sendin e huaj” poshtë makinës, duke njoftuar më pas policinë, e cila ka bërë ç’aktivizimin.
Në njoftimin zyrtar, policia thotë: Më datë 16.02.2020, rreth orës 08:56, shtetasi S. L. 46 vjeç, banues në lagjen “Ahmet Haxhija”, Shkodër ka njoftuar Sallën e Drejtimit në DVP Shkodër, se poshtë mjetit të tij tip Benz, ka konstatuar një pako të mbështjellë me letër natriban ku dyshohet se mund të ketë lëndë plasëse.
Në vend ndodhen shërbimet e policisë dhe grupi hetimor ku vijon puna për sqarimin e rrethanave të ngjarjes.
Kjo ngjarje rëndë vjen në kohën kur qeveria ka ndërmarrë një operacion të gjerë kundër krimit në qytetet kryesore të vendit. /tesheshi.com/
