Tre vetë humbën jetën në Holandë, tre në Gjermani dhe një në Belgjikë të enjten pasi stuhia Friederike rrëzoi pemët, nxori kamionët jashtë rrugës dhe detyroi anullimin e qindra fluturimeve.
Aeroporti Schiphol i Amsterdamit pezulloi shkurtimisht të gjithë trafikun ajror, ndërsa erërat me shpejtësi deri në 140 km/h (85 mph) u regjistruan përgjatë bregdetit.
Të paktën 260 fluturime u anuluan dhe rënia e pllakave të kulmit çuan në mbylljen e terminaleve të aeroportit. Shërbimet e trenave mbarëkombëtare dhe shumë shërbime të tramvajit dhe autobusëve u ndaluan pasi u aktivizua alarmi më i lartë i rrezikut nga moti i lig.
Në Belgjikë një grua që ngiste nëpër zonën e Beausart Wood afër Brukselit vdiq kur një pemë ra në makinën e saj. Policia holandeze tha se tre vetë humbën jetën nga pemët ose pjesë të ndryshme në incidente të ndara në Holandë.
Në Roterdam, dërgesa të kontejnerëve u shkatërruan dhe çati të tëra u shkulën nga shtëpitë. Schiphol më vonë tha se disa fluturime do të rifillonin ndërsa stuhia u zhvendos në brendësi të vendit, por që do të kishte vonesa të mëdha.
Në Gjermani, një 59-vjeçar humbi jetën nga një pemë që u rrëzua për tokë në Emmerich afër kufirit holandez, tha një zëdhënës i qytetit dhe një shofer 68-vjeçar humbi jetën në një aksident gjatë stuhisë në Lippstadt, në Gjermaninë Perëndimore, tha policia.
Në Bad Salzungen, Gjermani, një zjarrfikës 28-vjeçar humbi jetën kur një pemë ra mbi të ndërsa përpiqej të ndihmonte një grua që ishte bllokuar në makinën e saj nga pemët e rrëzuara.
Në pjesën veriore të Rajonit të Westfalisë (NRW), shteti më i populluar i Gjermanisë, 41 persona u plagosën në aksidente të trafikut të motit, tha policia. Rreth 100,000 banorë në NRW dhe në pjesën veriore të Saksonisë së Poshtme mbetën pa rrymë, tha një zëdhënës i kompanisë energjetike Westnetz.
Operatori hekurudhor gjerman, Deutsche Bahn, tha se kishte pezulluar pothuajse të gjithë shërbimin hekurudhor në distanca të gjata për shkak të stuhisë dhe ndërprerje tjera pritën përsëri të premten. Trenat rajonalë u ndalën në të gjithë Gjermaninë veriore dhe lindore dhe disa zona të tjera, thuhet në deklaratë.
Në një deklaratë, operatori hekurudhor tha se vetëm një numër i kufizuar i trenave po vepronin në rrugët ndërkombëtare. Ai tha se kishte dërguar ekipet e emergjencës për t’u marrë me dëmet e shkaktuara nga stuhia. /tesheshi.com/
