Alibeaj, njeriu që zëvëndësoi Bashën e dorëhequr në PD, e që kontrollin grupin parlamentar demokrat, nuk i është nënshtruar Berishës, duke sjellë irritimin e këtij të fundit.
Prej javësh, kishte një përpjekje për afrimin e dy PD-ve, asaj Alibeaj e asaj Berisha, me shkak pasjen e një kandidati të përbashkët për Lokalet e majit të vitit të ardhshëm. Por Alibeaj nuk pranuar kushtet e Berishës.
Në një deklaratë, PD Alibeaj tha: “Ne shprehim keqardhjen që në kundërshtim me zotimin publik për ‘bisedime pa kushte’, prevaloi interesi dhe kushti për të njohur “Statutin” e 11 Dhjetorit, duke minuar në këtë mënyrë bisedimet
për të gjetur zgjidhje për zgjedhjet lokale. Anëtarët, simpatizantët dhe votuesit e Partisë Demokratike, janë të lodhur nga debati ‘kush është statuti në fuqi i Partisë Demokratike’. Ato kërkojnë zgjidhje për të unifikuar çdo zë opozitar përballë Edi Ramës në zgjedhje lokale. Humbja e kësaj mundësie me kokëfortësi dhe duke injoruar situatën e rëndë që po kalon Partia Demokratike, nuk është në interes të qytetarëve dhe dobëson alternativën e opozitës në zgjedhjet lokale të 14 Majit.
Refuzimi i vazhdueshëm i çdo propozimi të bërë nga ana jonë, përfshirë propozimin final të paraqitur edhe me shkrim, është tregues i mungesës së sinqeritetit dhe vullnetit për të gjetur zgjidhje. Ky refuzim provon paramendimin për të mos gjetur zgjidhje dhe vënien para faktit të kryer të palës tjetër. Kjo bëhet evidente nga fakti që ndërsa palët ishin në bisedime mes tyre, njëra palë vijonte me akte të njëanashme apo me deklarata publike të disa përfaqësuesve politik që shkonin në frymën e nxitjes së dështimit të bisedimeve mes palëve.
Nisur nga kjo situatë, Grupi Parlamentar i Partisë Demokratike ka kërkuar të informohet Kryesia e Partisë Demokratike, për t’i hapur rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore”, thuhet në njoftim.
Fill pas kësaj deklarate, shpërtheu Berisha, në stilin e tij. “Statuti i 11 dhjetorit është kushtetuta historike e
pathyeshme e PD së rithemeluar. Statuti është jashtë çdo lloji imagjinate kompetence për t’u shkelmuar. Ai është dokumenti bazë i PD-së në momentet kur ajo ndodhej para alternativës ‘to be or bot to be’. Është themeli i saj ku është ngritur kjo forcë politike më e fuqishme se kurrë.
Zotërinjtë të cilët janë një grup deputetësh u ftuan pa asnjë lloj paragjykimi dhe prapamendimi që të garonin për çdo post në këto bashki dhe të paraqisnin kandidatura në përputhje me statutin të krijonin fraksione. Ata nuk duan as statutin as primaret e as fraksionet”, tha Berisha.
Tashmë është e qartë: PD, ashtu siç ishte, nuk do ketë më. Së paku në këtë stad dhe me këto figura. /tesheshi.com/
