Pandemia la pasoja të qëndrueshme në shëndetin e trurit të njerëzve mbi 50 vjeç
Mbylljet dhe kufizimet e vendosura nga pandemia kanë pasur “efekte vërtet të qëndrueshme” në shëndetin e trurit të njerëzve mbi 50 vjeç, sugjeron hulumtimi.
Studimi tregoi se funksioni njohës dhe kujtesa e punës tek të moshuarit ranë me shpejtësi gjatë pandemisë, pavarësisht nëse ata ishin apo jo të infektuar me COVID.
Studiuesit thonë se kjo mund të jetë për shkak të faktorëve të përkeqësuar nga pandemia, të tilla si mosushtrimi i mjaftueshëm fizik dhe pirja e tepërt e alkoolit, si dhe vetmia dhe depresioni.
Një ekip i përbërë nga studiues nga Universiteti i Exeter në Mbretërinë e Bashkuar dhe Instituti i Psikiatrisë, Psikologjisë dhe Neuroshkencës (IoPPN) në King’s College në Londër analizoi testet e funksionit të trurit të 3,142 njerëzve që morën pjesë në studimin Protect, i cili fillimisht u lançua në vitin 2014, duke marrë njohuri mbi funksionet e trurit të njerëzve mbi 40 vjeç gjatë një periudhe prej 25 vjetësh.
Personat e përfshirë nga hulumtimi janë të moshës ndërmjet 50 dhe 90 vjeç dhe jetojnë në Mbretërinë e Bashkuar.
Ekipi shikoi të dhënat nga marsi 2019 dhe shkurt 2020, duke i krahasuar me të dhënat e mbledhura gjatë viteve të para (mars 2020 deri në shkurt 2021) dhe të dytë (mars 2021 deri në shkurt 2022) të pandemisë.
Analiza tregoi se shkalla e rënies njohëse u përshpejtua në vitin e parë të pandemisë dhe ishte më e lartë në mesin e atyre që tashmë po shfaqnin shenja të rënies së lehtë njohëse përpara shpërthimit të COVID-19.
Modeli vazhdoi në vitin e dytë të pandemisë, për të cilën studiuesit thonë se sugjeron një efekt pas mbylljeve fillestare kombëtare në 2020 dhe 2021.
Anne Corbett, profesoreshë e hulumtimit të demencës dhe udhëheqëse e studimit Protect në Universitetin e Exeter, tha: “Gjetjet tona sugjerojnë se bllokimi dhe kufizimet e tjera që përjetuam gjatë pandemisë kanë pasur një efekt të vërtetë afatgjatë në shëndetin e trurit tek njerëzit e moshës 50 e lart, edhe pas përfundimit të mbylljes.
Kjo ngre pyetjen e rëndësishme nëse njerëzit janë potencialisht në rrezik më të madh të rënies njohëse që mund të çojë në çmenduri,” vuri në dukje ajo. /tesheshi.com/
