Një studim i kërkuesve të Universitetit të Stërlingut në Skoci ka dalë në përfundimin se goditja me kokë e topit të futbollit mund të ketë ndikim gjer në një ditë mbi kujtesën dhe funksionet e trurit të lojtarit.
Sipas studimit, rendimenti i kujtesës mund të zvogëlohet nga 41 gjer në 67 për qind gjatë goditjeve me kokë, ndërsa efektet humbasin pas 24 orësh.
Kërkuesit hodhën topa futbolli nga një makineri, ngjashëm me goditjet e këndit, dhe i kërkuan një grupi lojtarësh që ta godisnin topin 20 herë.
Magdalena Ietswaart, një shkencëtare në fushën e neurologjisë në universitetin e sipërpërmendur, i tha sot BBC-së se, “Pamë në të vërtetë se kishte frenim të shtuar në tru menjëherë pas goditjes me kokë, e se rendimenti në provat e kujtesës u zvogëlua në mënyrë të ndjeshme.”
“Edhe pse ndryshimet ishin të përkohshme, besojmë se ato janë domethënëse për shëndetin e trurit, veçanërisht nëse ato ngjasin orë e çast, si në goditjet me kokë të topit të futbollit,” deklaroi po ajo.
Studimet në vitet e fundit kanë vënë në pah shqetësimin mbi efektet e goditjes me kokë në mënyrë të përsëritur të një topi futbolli.
Jeff Astle, një ish-qendërsulmues i Uest Bromuiç Albionit, i njohur për aftësitë e tij të jashtëzakonshme në goditjet me kokë, vdiq në vitin 2002 në moshën 59-vjeçare; një hetim nxori si konkluzion se ai kishte vdekur nga “dëmtimi në punë”.
Organet përkatëse të futbollit në SHBA ua kanë ndaluar prej kohësh fëmijëve nën dhjetë vjeç goditjen e topit me kokë, ndërsa ata të moshës 11 deri në 13 vjeç e kanë të kufizuar goditjen me kokë në stërvitje. /tesheshi.com/
