Një studim i CBI-së, një grupi biznesi, i publikuar të dielën, zbulon se Brexit-i, apo dalja nga BE-ja, do të sjellë një goditje të vërtetë për ekonominë britanike. Vendet e punës, rritja ekonomike dhe standardet e jetesës mund të marrin një goditje të fortë nëse skenari i daljes realizohet.
“Kjo analizë tregon fare qartë pse lënia e Bashkimit Europian do të qe një goditje e vërtetë për standardet e jetesës, për vendet e punët dhe rritjen ekonomike,” deklaroi Carolyn Fairbairn, drejtoresha e përgjithshme e CBI-së.
Sipas studimit, dalja nga BE-ja do t’i kushtojë vendit 950.000 vende pune, çka do të thotë se papunësia do të jetë 2-3 për qind më e lartë nga 2020-ta. Edhe në aspektin ekonomik e financiar, humbjet do të jenë të barabarta me pesë për qind të GDP-së.
23 qershori është data kur britanikët do të votojnë për daljen ose në qëndrimin në BE. Anketimet e deritanishme flasin për një baraspeshë të qëndrimeve, ndërsa 20 për qind e votuesve janë ende të pavendosur. /tesheshi.com/
