Mungesa e tregut të punës ka nxitur një grup të rinjsh të diplomuar në Ferizaj të ndërmarrin një aksion simbolik, thuajse të pazakontë.
Anëtarët e organizatës “Demokracia Studentore” kanë djegur diplomat e fotokopjuara, për të treguar se në Ferizaj nuk ka më vend për ata që studiojnë dhe diplomohen dhe se ky vend është bërë vatër e nepotizmit dhe klientelizmit partiak.
Mexhit Ramusa, kryetar i kësaj organizate theksoi se janë të detyruar t’i djegin diplomat sepse nuk po gjejnë punë. Sipas tij, kryetari i Ferizajt po punëson militantë të partisë së tij, pa diploma dhe po i diskriminon të diplomuarit.
Në aksionin e studentëve mori pjesë edhe qytetari Beqir Beqiri, i cili dogji çertifikatën e diplomës së vajzës së tij, pasi nuk ka arritur të punësohet për gjashtë vjet.
Tejet i dëshpëruar me pamundësinë që vajza e tij të gjejë një vend pune, prindi bëri një thirrje të pazakontë për të rinjtë, duke u thënë që të shkojnë në organizatën islamike ISIS sepse në Kosovë nuk ka punë.
Ky prind i mërzitur me thirrjen e tij, kërkoi që të paralajmërojë qoftë qeverisjen lokale, apo atë qendrore, që të ofrojnë punësim të barabartë për të gjithë rininë dhe të mos bëjnë punësime klienteliste partiake, sepse në të kundërtën të rinjtë edhe mund të braktisin vendin.
Por, akuzat e studentëve se në komunën e Ferizajt po bëhen punësime partiake i ka hedhur poshtë nënkryetari i kësaj komune, Xhavit Zariqi, duke thënë të kundërtën.
Ndërkohë, lidhur me ftesën e qytetarit Beqiri për të rinjtë që të shkojnë në ISIS, Zariqi i hedh benzinë zjarrit duke thënë se të diplomuarit mund të shkojnë ku të duan.
Ndërsa, Milaim Nuhiu, sekretar i i organizatës “Demokracia Studentore” tha se është i detyruar të largohet nga vendi sepse nuk po gjen punë, edhe pse është diplomuar prej një viti dhe ka konkurruar me dhjetëra herë. Ndryshe, kuvendi i Kosovës ka miratuar Ligjim mbi ndalimin e bashkimit në konflikte të armatosura jashtë territorit të vendit./tesheshi.com/
