Nga Blendi Gashi
Pas një kohë qetësie janë rikthyer protestat në Universitetin e Prishtinës ku sërish në shenjë është largimi i rektorit, pra aktualit Marian Dema.
Protesta me kërkesë dorëheqjen e Demës nisi të mërkurën në mëngjes nga një grup studentësh nga organizata “Demokracia Studentore” të cilët kërkuan llogari nga rektori i UP-së, për siç thanë skandalin e tenderit te pishat, skandalin e rastit “Graniti”, skandalin me bursa.
Mexhid Ramusa, kryetar i kësaj organizate akuzoi rektorin Dema, se për inate personale ka bllokuar sistemin akademik.
I vetëdijshëm se i është bllokuar dera e hyrjes së Rektoratit, rektori Dema i ftoi të hyjnë brenda për të diskutuar rreth shqetësimeve të parashtruara, por grupi protestues refuzoi diskutimin në senat, me arsyen se rektori ka refuzuar t’i pranojë në takim.
Madje, kur rektori po jepte deklaratën e tij para mediave, plasi debati në mes të tij dhe kryetarit të organizatës, Mexhid Ramusa, me ç’rast ky i fundit kërkoi llogari për 900 mijë euro nga rektori.
Rektori Dema ftoi studentët që të deponojnë ankesat tek organet kompetente për shqetësimet që kanë.
“Ejani bisedojmë brenda kështu i ka hije UP-së e jo të merremi me protesta të pa bazuara. Deponoje çdo gjë që ke. Jo me fjalë, por me shkrim. Deponoje… Besoj që mundeni me i vërtetuar këto. Për çdo gjë që keni nevojë iu ofrojmë shënime”, tha rektori Dema.
Por Ramosa bëri të ditur se nuk do të ndalen së protestuari derisa rektori Dema të dënohet për krimet që sipas tij i ka bërë.
Kritikat e ministrit të Arsimit për rektorin…
Kjo protestë e kësaj organizate çuditërisht vjen vetëm pak ditë pasi ministri i Arsimit, Shyqiri Bytyqi drejtoi kritika në drejtim të rektorit Dema.
“Nuk ka dinamizëm të punës, nuk vërehet dinamizëm në punë as tek Bordi as tek rektori Marjan Dema. Në UP sot kemi vetëm mësim ‘teaching’ nuk ka hulumtim, shkencë”, tha Bytyqi në emisionin “Pulsi” të KTV-së.
Por kryetari i organizatës që nisi protestat, Mexhid Ramusa, ka mohuar që po punojnë për interesa të caktuara, qoftë ato edhe politike.
“Ne nuk i përfaqësojmë interesat e askujt që përfiton nga kjo. Ne i përfaqësojmë vetëm interesat e studentëve dhe të UP-së. UP-ja gjithherë i ka ngritur në të kaluarën kauzat që kanë qenë në dëm të Kosovës e tash ne nuk po mund të mbrojmë as interesat e tij tash. Pse mos ta ngrisim zërin? Nuk jemi sistem komunist”, tha ai.
Kujtojmë se Marian Dema u zgjodh rektor më 31 mars të 2016-tës, pasi mori shtatë vota të anëtarëve të Këshillit Drejtues, ndërsa kundërkandidatët Afrim Hamidi dhe Xhevat Berisha vetëm nga një votë.
Mbetet të shihet nëse rektori Dema do të arrijë të qëndrojë në karrigen e “nxehtë” të parit të UP-së, apo edhe ai do ketë fati si ish-rektorët Ramadan Zejnullahu e Ibrahim Gashi që u dorëhoqën pas protestave të vazhdueshme të organizatave të caktuara studentore por jo vetëm. /tesheshi.com/
