Duke folur në shpalosjen e strategjisë kombëtare të energjisë deri në vitin 2030, kryeministri Rama bëri me dije dhe nismën për t’u ofruar qytetarëve të thjeshtë mundësinë e të qënit aksionerë në rrjetin e shpërndarjes.
“Në harkun e pak viteve të kemi një hapje 100% të tregut të energjisë. Sot, falë këtij procesi ne kemi nisur përgatitjet për një tjetër hap shumë të rëndësishëm që besoj do të krijojë një atmosferë të re në marrëdhëniet mes konsumatorëve dhe OSHEE, por dhe do të çojë në një shkallë tjetër modernizimin e kompanisë, transparencën e punës së kompanisë dhe efikasitetin e saj. Shpresoj që deri në fund të këtij viti të jemi gati që tu ofrojmë qytetarëve shqiptarë mundësinë e pjesëmarrjes si aksionerë në kompaninë e shpërndarjes së energjisë, me ambicien që vitin e ardhshëm kompania të kthehet në një kompani ku pjesëmarrja masive e qytetarëve si aksionerë do të ketë një benefit reciprok”, theksoi shefi i ekzekutivit. /tesheshi.com/
