Gjykata e Strasburgut ka pushuar çështjen civile të 21 janarit, ku familjarët e 4 të vrarëve depozituan padi ndaj qeverisë shqiptare, që i kishte shkaktuar me mungesën e drejtësisë një dëm ekonomik dhe psikologjik.Padia është depozituar në vitin 2013.
Pushimi i çështjes ka ardhur pas tërheqjes së familjarëve, të cilët pranuan kushtet e dëmshpërblimit të propozuara nga qeveria.
Në dhjetor të vitit 2016, kjo e fundit i dërgoi një letër Gjykatës së Strasburgut, ku i bënte me dije se ishte e gatshme të rihapte çështjen e 21 janarit, si dhe të negocionte me familjarët e viktimave masën përkatëse të dëmshpërblimit.
Qeveria propozoi një dëmshpërblim prej 93,600 eurosh për familjarët e Ziver Veizit: përkatësisht, 39 mijë për bashkëshorten, 39 mijë për të birin, dhe 15,600 euro për të vëllain e viktimës, Çaush Veizi.
Për Zabit Dedën, vëllain e një prej viktimave të tjera të 21 janarit qeveria ka propozuar një dëmshpërblim prej 15,600 eurosh. Në total, katër të afërmit janë dëmshpërblyer me 109 mijë euro, shifër edhe e pranuar prej tyre.
Dhe në vendimin përfundimtar, Gjykata e Strasburgut, e konsideron çështjen si një marrëveshje mirëkuptimin mes palëve, shkak për të cilin nuk ka nevojë për një ekzaminim të mëtejshëm të padisë së të afërmve të 21 janarit.
“Gjykata vlerëson se duke parë dakordësinë e paditësve me deklaratën e bërë nga qeveria, çështja duhet konsideruar si një marrëveshje me mirëkuptim mes palëve”, thekson vendimi përfundimtar i Strasburgut.
Nëse familjarët nuk do të tërhiqeshin ka pasur gjasa që shuma që i caktohej si dëmshpërblim qeverisë shqiptare të ishte më e madhe.
Por familjarët kanë deklaruar se ata kërkojnë drejtësi për të dashurit e tyre që u vranë gjatë një proteste të opozitës në bulevardin “Dëshmorët e Kombit”.
Në aspektin penal, të gjitha shkallët e Gjyqësorit e kanë mbyllur çështjen duke mos dënuar apo fajësuar asnjë për vrasjen.
Çështja që u mbyll ka qenë vetëm për Ziver Veizajn dhe Hekuran Dedën, ndërkohë që për Aleks Nikën dhe Faik Myrtajn duhet të zhvillohet proces tjetër, pasi të dalin provat nga balistika.
Siç mësohet nga familjarët, provat e reja janë gati, pasi një ekip ekspertësh kanë arritur të nxjerrin një fakt që cilësohet i rëndësishëm, por që presin që të shqyrtohet nga Prokuroria e re Speciale që do të nisë punë në përfundim të Vettingut. Ka shumë gjasa që edhe rezistenca kaq e madhe ndaj Vettingut të ketë lidhje dhe me një copës “21 janar” ende të pambyllur e që mund të fundos përgjegjësit e masakrës. /tesheshi.com/
