Sekretari i përgjithshëm i NATO-s, Jens Stoltenberg, ka dhënë fjalën gjatë një vizite dyditore në Varshavë për dërgimin e më shumë trupave të NATO-s. Do të ketë më shumë trupa të NATO-s të dislokuara në Poloni, për t’i risiguruar vendet lindore që ndjehen të kërcënuara nga Rusia, premtoi ai.
“Le të jem i qartë: do të ketë më shumë trupa të NATO-s në Poloni pas samitit të Varshavës, për të dërguar një sinjal të qartë se një sulm mbi Poloninë do të konsiderohet si një sulm mbi tërë aleancën,” tha Stoltenberg në nisje të vizitës.
Takimi i ardhshëm i NATO-s do të zhvillohet në korrik në Poloni, ku dhe do të shqyrtohet dislokimi i batalioneve aty dhe në vendet balltike.
Shefi i aleancës ushtarake njoftoi se po diskutohej numri i saktë i trupave që do të dërgoheshin, si dhe vendet e qëndrimit të tyre, duke shtuar se prania ushtarake do të ishte shumëkombëshe dhe me rotacion.
Në Poloni do të zhvillohet një stërvitje e madhe ushtarake në datat 7-17 qershor, e quajtur Anakonda 2016, e ku pritet të marrin pjesë 25.000 trupa. Stoltenberg e mohoi që kjo stërvitje mund ta shtojë tensionin me Rusinë. “Nuk ka arsye që të krijojë ndonjë shqetësim,” nënvizoi ai. /tesheshi.com/
