Nga Miradie Hasani
Dyert e NATO-s mbeten të hapura për Maqedoninë, por që ato të arrihen nevojitet ende punë për të bërë. Sekretari i përgjithshëm i NATO-s, Jens Stoltenberg pas takimit me kryeministrin e Maqedonisë Zoran Zaev, tha se nuk ka plan B për anëtarësimin e vendit në NATO, pos zgjidhjes së çështjes së emrit me Greqinë. Çelësi i vetëm që do t’i hapë dyert e Aleancës, është marrëveshja me Greqinë dhe ndryshimi i emrit kushtetues. Stoltenberg tha se mundësia që Maqedonia të hyjë në strukturat e NATO-s me referencën e përkohshme, është pothuajse zero.
“Në qoftë se përpjekjet tuaja bazohen në parashikime të rrejshme, se mund të bëheni pjesë e NATO-s pa e zgjidhur çështjen e emrit, përpjekjet tuaja do të jenë të kota. Këtë e përsëritëm më shumë herë”, u shpreh Jens Stoltenberg, Sekretar i Përgjithshëm i NATO-s.
Ndërsa Kryeministri Zaev tha se qeveria e tij po jep maksimumin për të gjetur një zgjidhje për kontestin disavjeçar.
“Në mënyrë aktive dhe të pandalshme japim hapësirë për tejkalimin e problemit që e ka Republika e Greqisë me emrin e shtetit tonë. Mendoj se po japim më të mirën për hapin e fundit që do e bëjmë bashkë. Sinqerisht presim që Maqedonia të jetë vendi i 30-të anëtare e NATO-s. Punojmë për këtë qëllim së bashku me qytetarët dhe te gjithë partnerët tjerë që veçmë janë anëtarë të NATO-s”– deklaroi Zaev.
Stoltenberg, në fjalën e mbajtur para deputetëve të Maqedonisë, ka mirëpritur hapat e ndërmarrë në procesin e reformave dhe miratimin e ligjit për gjuhët, por tha se shtetet pretenduese duhet të pranojnë vlerat tjera të NATO-së, apo reformat e domosdoshme për procesin e integrimit euroatlantik, duke veçuar nevojën për transparencën e institucioneve, reformat në kodin zgjedhor si dhe ligjin e medias.dër NATO-s
Por jashtë Kuvendit, fjalimi i kreut të NATO-së nuk është pritur me duartrokitje, por me protestë nga dhjetëra ithtarë të Kongresit Gjithmaqedonas, kundër ndryshimit të emrit, ligjit për gjuhët dhe marrëveshjes me Bullgarinë. Ata gjatë protestës dogjën një flamur të NATO-së ndërsa kishte edhe një protestë tjetër nga partia “E majta” kundër anëtarësimit në NATO
A dështon përpjekja e fundit që Maqedonia t’i bashkëngjitet familjes evropiane dhe të bëhet anëtare e NATO-së? Kjo dilemë po hapet pas deklaratës së negociatorit për çështjen e emrit nga pala maqedonase, Vasko Naumovski. Sipas tij asnjë shtet, as Kombet e Bashkuara nuk kanë të drejtë ta ndryshojnë emrin e një shteti, as të mohojnë ekzistimin e popullit dhe gjuhës maqedonase
“Shteti ynë ka emër, ky emër është Republika e Maqedonisë, i cili është baza e identitetit tonë, gjithashtu në vitin 2018 askush nuk mund ta mohojë ekzistimin e popullit maqedonas dhe gjuhës maqedonase”, u shpreh Vasko Naumovski.
Të panjohura akoma mbeten propozimet për të cilat u negociua të mërkurën në Nju Jork mes negociatorëve dhe ndërmjetësit të OKB-së, Metju Nimiç. E përditshmja greke “Ethnos” shkruan se Nimic në tavolinën e negociatave ofroi këto propozime: “Maqedonia e Re”, “Maqedonia e Epërme” si dhe “Maqedonia Veriore”. Sipas një analize të bërë në Greqi, tregohet se madje 70% e grekëve nuk duan që termi “Maqedonia” të përfshihet në zgjidhjen e kontestit. /tesheshi.com/
