Si zakonisht këto kohë, presidenti Meta e ka nisur ditën me një status politik në FB që kasi epilog slloganin “18 tetori po afron!”.
Siç dihet, 18 tetori është data kur Brukseli vendos për negociatat, e këto të fundit, kreu i shtetit i lidh me 13 Tetorin e tij si datë zgjedhjes lokale, ndonëse kjo datë është injoruar tërësisht nga ndërkombëtarët, pasi këta të fundit i mëshuan e më pas njohën 30 Qershorin.
“E vetmja zgjidhje janë zgjedhjet. Pa zgjedhje nuk ka demokraci. Pa demokraci nuk ka drejtësi të pavarur. Pa të dyja së bashku nuk ka të drejta dhe ekonomi për të gjithë shqiptarët. Dhe as ndëshkim për politikanët”, shkruan Meta.
Ndërkohë, i akuzuar nga mazhoranca si sajuesi okult i krizës shqiptare, si njeriu që së bashku me Berishën kanë nxitur djegien e mandateve dhe më pas bojkotin e zgjedhjeve, deri me pikësynimin e pengimit të hapjes së negociatave, ku në finale, gjithnjë sipas mazhorancës, ka qenë pengimi i avancimit të Reformës në Drejtësi me krijimin e SPAK-ut, Meta tenton të provojë të kundërtën.
Madje ai huazon një tezë të Ramës mbi negociatat, ku kreu i mazhorancës aludon se nëse ato hapen, ca kapituj të saj që kanë të bëjnë me drejtësinë do jenë telash i madh për klasën politike. Këtë mendon dhe Meta, kur thotë se “moszgjidhja i shërben vetëm pakicës që nuk njeh rotacion dhe nuk e do çeljen e negociatave të Shqipërisë me Bashkimin Europian, pasi ka për të humbur gradualisht pushtetin e paligjshëm politik, ekonomik dhe mediatik”, shkruan Meta, duke përfunduar me thirrjen “18 tetori po afron!”. /tesheshi.com/
