Gjenialiteti i Guardiola-s, i mishëruar në përsosurinë e një formacioni fitues, ka marrë më në fund çmimin e merituar, më të kërkuarin trofe të skuadrës më të kompletuar angleze.
Triumfi i spanjollit, njëherë e një kohë mjeshtri i mjeshtrave të Barcelonës, është vulosur nga këmba e një tjetër spanjolli, Rodri.
Fitorja 1-0 u ka mjaftuar kampionëve të Premier Ligës që ta përfundojnë në mënyrën më të mirë të mundshme sezonin, me një sukses të trefishtë dhe falë finales së fituar të FA Cup-it.
Stambolli është treguar sërish bujar me anglezët, ashtu si në finalen e 2005-s, kur Liverpuli i rrëmbente nga duart kupën Milanit me një përmbysje të hyrë në historinë e Champions League-s.
Një finale e luajtur me pjekuri ndaj një Interi të disiplinuar, me imponimin e ardhur ndoshta pak vonë në lojë, por të konkretizuar si duhet dhe kur duhet.
Skuadra italiane ka bërë sa ka mundur, pa ia dalë ta sfidojë gjer në fund logjikën dhe pritshmërinë masive, atë se koha e Manchester City-t për ta marrë titullin europian kishte mbërritur.
Arsyeja shpesh nuk ka vend në futboll, ndryshe nga mbrëmja e kësaj të shtune: trofeu shkoi aty ku duhej të shkonte!
“Futbolli është më tepër se një lojë, Stambolli është më tepër se një finale!” /tesheshi.com/
