Nga Blendi Gashi
Se politika i ka shtrirë duart në çdo fushë për interesa të ngushta apo qoftë edhe për një grusht votash, kjo fare nuk do koment. Pa u prekur nga politikanët nuk ka mbetur as sporti, gjë që e tregojnë qartë përplasjet e fundit mes partive rreth asaj se ku duhet të ndërtohet stadiumi nacional i Kosovës.
Edhe pse në janar të këtij viti qeveria “Mustafa”, konkretisht Ministria e Kulturës dhe Sportit e drejtuar nga Kujtim Shala përcaktoi fshatin Bërnicë të Poshtme, që ndodhet 4.5 km nga qendra e Prishtinës, në një hapësirë prej rreth 38 hektarësh si lokacion për ndërtimin e stadiumit, dhjetë muaj më vonë PDK-ja e cila tashmë gjendet në qeveri me Haradinajn ka dalë me ide për ndryshimin e lokacionit, duke thënë se stadiumi duhet të ndërtohet tek zona ekonomike përball Pakut të Biznesit në Drenas, konkretisht në fshatin Koreticë e Epërme që ndodhet në magjistralen Prishtinë-Pejë-Pejë.
Këtë ide e ka preznatuar kryetari i Drenasit, Ramiz Lladrovci para përfaqësuesve të Ministrisë së Kulturës, Rinisë e Sportit, dhe inxhinierit për infrastrukturë sportive, Refki Osmani, që shikoi nga afër zonën.
Lladrovci ka thënë se ky lokacion i plotëson të gjitha kushtet e parapara më rregulloret ndërkombëtare për ndërtimin e një stadiumi me përmasa ndërkombëtare, pasi që është ne qendër të Kosovës dhe ka autostradën shumë afër, aeroportin, kryeqytetin dhe zonat tjera ekonomike të vendit.
Ndërsa kjo ide e Lladrovcit ka gjetur siç duket përkrahjen e kreut të PDK-së Kadri Veseli po kundërshtohet ashpër nga zyrtarë të AAK-së, parti kjo në bashkëqeverisje me PDK-në si dhe nga Lëvizja Vetëvendosje.
Veseli të shtunën përmes një shkrimi në Facebook deklaroi se ka marrë mbështetje nga Hungaria për ndërtimin e dy stadiumeve olimpike.
“Hungaria është mbështetëse e madhe e Kosovës dhe është e gatshme që vendin tonë ta përkrahë financiarisht në disa projekte, siç është ndërtimi i stadiumeve olimpike në Prizren dhe në Drenas, si dhe modernizimi i stadiumeve në Mitrovicë dhe në Prishtinë. Këto dhe të tjera projekte në vlerë prej dhjetëra miliona eurosh, së shpejti do të vihen në jetë”, shkruan Veseli duke lënë të kuptohet se stadium nacional do ndërtohet në Drenas, pasi nuk përmend ndërtimin e një stadium të ri në kryeqytet por vetëm modernizimin e stadiumit aktual, i cili në fakt edhe është duke u rindërtuar.
Ja ç’thotë ministri i Sportit…
Që stadiumi mund të ndërtohet në Drenas siç po dëshiron PDK-ja e ka lënë të hapur edhe ministri i Kulturës dhe Sportit, Kujtim Shala
“Jemi duke analizuar çështjen e lokacionit dhe së shpejti do të dalim me propozim se ku mund të jetë lokacioni më i përshtatshëm. Do të takohemi me përfaqësuesit e Federatës dhe do të dakordohemi për këtë projekt. (Drenasi v.j.) Është një nga lokacionet që e kemi si ide, por edhe Bërnica mbetet opsion. Ta shohim këto ditë ku mendojmë që është më e përshtatshme“, ka thënë ministri Gashi për “Koha Ditore”.
Kundër partia e Ramushit dhe Vetëvendosje
Ndërsa PDK-ja ka nisur ta punojë për ta jetësuar idenë e saj për ndrirmin e lokaconit të stadiumit nacional ku ka gjasa ta arrijë synimin duke ditur se udhëheq me Ministrinë e Kulturës e Sportit, kundër një mundësie të tillë po shprehen jo vetëm përfaqësues të opozitës por edhe të AAK-së që është në pushtet.
Avni Arifi, këshilltar i kryeministrit Haradinaj ka deklaruar të kundërtën e asaj që thotë Veseli dhe Lladrovci.
Ai shprehet i bindur se stadiumi do ndërtohet në fshatin Bërnicë ku është paraparë të ndërtohet qysh në fillim.
“Stadiumi Olimpik ndërtohet aty ku ishte planifikuar. Pra në Bërnicë të Poshtme. Është gënjeshtër e kulluar ideja e zhvendosjes së tij në Drenas”, shkruan në Facebook Arifi.
Kundër dyshes së PDK-së është shprehur edhe Shpend Ahmeti, kryetar aktual i Prishtinës i cili është në garë të marrë edhe mandatin e dytë.
Ahmeti e ka quajtur të paarsyeshme idenë e PDK-së që stadium national të ndërtohet në Drenas.
“Stadiumi kryesor i secilit shtet gjithmonë është në kryeqytet. Është e paarsyeshme që të diskutohet ndërtimi i çfarëdo stadiumi tjetër nga qeveria pa u ndërtuar stadiumi nacional në Bërnicë, Kryeqytet, Komuna e Prishtinës”, ka thënë ai.
FFK-ja s’di asgjë
Ndërsa partitë kanë nisur “luftën” se ku duhet të ndërtohet stadium, Federata e Futbollit të Kosovës në krye me Fadil Vokrrin nuk di gjë.
“Ne nuk dimë asgjë për këtë punë. Vendi është caktuar kohë më parë nga Qeveria e mëparshme. Është nda edhe toka që tashmë është në pronësi të MKRS-së. Ka filluar edhe fizibiliteti ku kanë konkurruar nëntë kompani. Ata janë përgjegjës për këtë punë. Është e rëndësishme që të bëhet stadiumi Nacional, kjo është më e rëndësi. Ne mendojmë dhe shpresojmë të jetë aty (Bërnicë), por me rëndësi është që të ndërtohet pa marr parasysh ku”, ka deklaruar për “Express” Agim Ademi, nënkryetar i FFK-së.
Mbetet të shihet se kush do ta fitojë këtë betejë, Drenica apo Prishtina. /tesheshi.com/
