Kryeministri Rama shfrytëzoi marrjen nga Shqipëria të kryesimit të Këshillit të Sigurimit, proces i cili do të zgjasë një muaj, për të lëshuar mesazhe të forta për botën, me kryefjalë Rusinë, por duke kaluar nga Srebrenica dhe Kosova.
Parë politikisht, që të dyja, Rama i ka ndërfutur mjeshtërisht në funksion të asaj çfarë ndodhi pak ditë më parë në parlamentin shqiptar, ku mazhoranca ra në kurthin e një diversioni politik të Berishës, duke refuzuar një Rezolutë për Srebrenicën, diktuar, krejt jashtë konteksti, nga ky i fundit.
“Kolegë, na duhet të dëshmojmë vepra e jo vetëm fjalë. Na duhet të themi sot më shumë se kurrë, kurrë më.
I detyrohemi me vepra e jo me fjalë mijëra viktimave në Serbrenicë. Të gjithë atyre që kanë vuajtur masakra e krime kundër njerëzimit. 20 mijë gratë e dhunuar gjatë spastrimit etnik në Kosovë, në 98-99”, tha Rama ndër të tjera, teksa e vuri theksin te Ukrina.
“Lufta në Ukrainë paraqet sfida për mbarë botën. Vënia përpara përgjegjësisë për krimet, është kyçe për të rivendosur besimin e publikut te drejtësia. Siç e dimë çështja e llogaridhënies mbetet e rëndësishme. Shtetet që shkelin të drejtën ndërkombëtare duhet të vendosen përpara përgjegjësisë. Duhet të bëjmë gjithçka për të riangazhaur ndaj normave dhe vlerave dhe të rrisim përpjekjet për të zbatuar.
Është e rëndësishme që të punojmë së bashku. Duhet të bëjmë gjithçka që mundemi për të bërë botën më të vogël për shkelësit. Pandëshkueshmria duhet të mbetet histori”, tha Rama, duke u vënë kështu në sinkron me qëndrimet e Perëndimit.
“Në vend që të mallkosh errësirën, ndiz një qiri”, ishte shprehja e Nënë Terezës e cituar nga Rama. /tesheshi.com/
