Alfred Peza ka rrëfyer të gjithë historinë e jetës së tij përpara Sokol Ballës në Top Story.
Për thuajse 90 minuta, deputeti socialist, një nga gazetarët më të njohur në vend, ka nxjerrë nga goja e tij fakte të panjohura deri tani, ose të paktën publikisht.
Duke iu referuar ngjarjes së ditëve të fundit kur Peza u akuzua për pasuri të paligjshëm, ka nxjerrë një turrë me letra, shkresa zyrtare, të cilat vërtetonin se të gjitha paratë e deklaruara të tij janë fituar përpara 23 qershorit 2013 kur ai ka hyrë në politikë.
“Këto ditë, ka një zhurmë të madhe të madhe përsëri me miliona, siç është hetimi për CEZ-in, ku një i afërm i qeverisë Berisha ka tërhequr para cash nga një bankë 7 milion euro”, tha ai
Këtë sulm ai e quajti “reciprocitet politik”.
“Ka një reciprocitet politik në sulmin tim. Reciprociteti ishte hajde të shpikim një histori paralele në anën e mazhorancës që bën fjalë po për miliona dhe njerëz politikë dhe u gjet historia e Alfred Pezës”, tha ai, duke shtuar se shkrimi fillestar për pasurinë e tij jep me qëllim disa pasaktësi.
Deputeti socialist shtoi se e gjithë kjo histori nuk e ka bërë që të pendohet se përse iu fut politikës.
“Nuk pendohem kurrë për vendimet që marr. Nuk jam bërë pishman për asgjë. Unë raportin e kam me të vëertetën”, tha Peza.
Ai për sulmin thotë se është angazhuar gjithë familja e ish-kryeministri Berisha, ndërsa shton se nisjen e hetimeve e mirëpret.
“E kam pritur me qetësinë më të madhe lajmin për nisjen e hetimeve. Në këtë histori u investua familjarisht familja e Sali Berishës, në një ditë tre statuse nga Sali Berisha, dhëndëri dhe djali i tij”, deklaroi ai.
1997
Më pas Peza ka rrëfyer një histori që nuk e kishte bërë asnjëherë të ditur, atë të torturimit të tij në vitin 1997 nga njerëzit e policisë speciale të Sali Berishës.
Po shoqëroja në Vlorë një gazetar të Corriere Della Sera-s, pikërisht Luigi Ipolito, por na ndalën në Fier.
“Gazetarin italian e kthyen, kurse mua më morën në komisariat dhe më kanë torturuar pa pushim për orë të tëra duke më bërë gjithë plagë. I falënderoj se nuk më kanë goditur në kokë dhe organet gjenitale. Jam liruar vetëm pasi u bë një alarm ndërkombëtarisht nga gazetari Italian”, rrëfeu deputeti socialist, një histori që shumëkush prej gazetarëve të asaj kohe e dinë, por që vetë Peza ia ka rrëfyer publikut vetëm tani kur emrii tij është vënë në qendër të vëmendjes për shkak të pasurisë. /tesheshi.com/
