Në një shkrim me titull “’Shteti paralel’ i Gylenistëve vihet sërish në lëvizje në Shqipëri”, publikuar në Tema online, komentues të ndryshëm kanë cituar emrin e Bujar M. Hoxhës si përkthyes i shkrimit.
Ne si redaksi e portalit tesheshi.com i bëjmë me dije opinionit, dhe të gjithë atyre që aludojnë se ky shkrim ka dalë nga duart e bashkëpunëtorit të këtij portali, Bujar M. Hoxha, se kjo nuk është aspak e vërtetë.
Nëse do kishte qenë kështu, Tema online do e kishte respektuar etikën profesionale, duke vënë në fund të shkrimit burimin nga është marrë, pra, tesheshi.com, siç ka vepruar dhe me shkrime apo përkthime të tjera.
Eshtë rasti të sqarohet se bashkëpunëtori Bujar M. Hoxha i vendos autorësinë çdo produkti të dalë prej tij, shkrim apo përkthim, pa bërë përjashtime mbi tematikën, subjektin apo objektin e trajtuar.
Veç kësaj, stili i përkthimit të artikullit të cituar më sipër ndryshon kryekëput nga ai i bashkëpunëtorit tonë.
Po ashtu është rasti të sqarohet lexuesi se tesheshi.com nuk ndërton asnjë lloj gazetarie të mbështetur mbi parapëlqime ose mospëlqime me natyrë sektare, politikisht, etnikisht apo fetarisht.
Ajo ka zgjedhur të jetë e hapur dhe me parime që kanë si kriter promovimin e së vërtetës dhe së drejtës, ngado që vjen ajo dhe prej çdokujt, duke ndjekur kështu mënyrën më efikase për të luftuar gënjeshtrën dhe të padrejtën, mbi këdo që mund të rëndojnë ato.
Redaksia e tesheshi.com
