Një manifestim rinor i organizuar nga shqiptarët e Malit të Zi në malësinë e Tivarit është damkosur nga media ruse si një “demonstrim i armatosur për Shqipërinë e Madhe”.
Është media kryesore e Kremlinit, “Sputnik” e cila në ballinën e saj ka publikuar një shkrim i cili titullohet: “Shqiptarët e armatosur pushtojnë Ruminë në ditën e pavarësisë së Malit të Zi”.
Dhe si pamje jepen disa persona që gjuajnë me pushkë loje me shigjeta të vogla, siç ndodh në çdo park lojrash ambulantë.
Rumia është një piknik që organizohet për të gjashtin vit radhazi, kryesisht nga rinia. Aty ngrihen kampingje me tenda ku piqet mish e luhen lojra nga më të ndryshmet.
Qëllimi kryesor i këtij manifestimi është ruajtja dhe përtëritja e traditës shumëshekullore të popullatës vendase të daljes në majën e malit të Rumisë, i cili konsderohet si simbol i ekzistencës së tyre. Po ashtu, qëllim në vehte është njohja me bukuritë natyrore të kësaj ane si dhe shoqërimi i bjeshkatarëve dhe krijimi i njohjeve të reja ndërmjet tyre.
“Dita e Rumisë” si manifestim unik vlerësohet ndër veprimtaritë kryesore të kësaj treve duke tubuar dashamirësit e traditës, historisë, kulturës, natyrës, bjeshkatarisë etj. Pjesëmarrës kanë qenë me qindra bjeshkatarë nga Kraja, Tivari, Ulqini, Ana e Malit, Malësia, Shqipëria, Kosova etj., duke ndikuar në masivizimin e këtij manifestimi i cili me vlerat që përçon është bërë tashmë pjesë e ofertës turistike.
Por ç’bën “Sputnik”? E quan një manifestim tejekëput politik.
“Një grup i madh i shqiptarëve, në mesin e të cilëve ishin ato në uniforma të maskuara dhe me armë, u mblodhën në një lloj të kampit të luftës në krye të malit Rumija, mbi Bar(Tivar), dhe më 21 maj, kur Mali i Zi zyrtari shënoi Ditën e Pavarësisë treguan forcën e tyre. Përveç njerëzve me uniformë e të armatosur me thika të gjata në takim ishin njerëzit të veshur me bluza që stampohej e ashuquajtura ‘Shqipëri natyrale’. Në kampin ushtarak ishte edhe Kryetari i Komunës së Ulqinit, Nazif Cungu, i cili u përpoq jashtë të fshihte të shtënat”.
Dhe në mënyrën më të pakuptimtë, “Sputnik” thekson se dëshmia për të treguar agresivitetin është valëvitja e flamujve kuqezi nga shqiptarët; gjë që atë e kanë bërë edhe në kohën e Titos.
“Sputnik” akuzon autoritetet e Malit të Zi se nuk ka reaguar meqë është valëvitur flamuri kombëtar shqiptar, e që në këtë vend quhet akt i paligjshmëm.
Dhe më pas portali që financohet nga Kremlini bën një paralelizëm: “Policia malazeze arrestoi menaxherët e një hoteli në Budva pasi valëvitën flamurin trengjyrës të Serbisë me të cilin është mbuluar edhe arkëmorti i Knjaz Nikollës. Është e qartë, pra, se në Mal të Zi përdoren standarde të dyfishta, dhe se çdo gjë është e lejuar pasi në fuqi është koalicioni qeverisës malazezo-boshnjako-shqiptar, ku është instaluar një shtet që vepron vetëm kundër pjesëtarëve të popullit serb në Mal të Zi, i cili ka mohuar të drejtat themelore të njeriut. Flamuri shqiptar valëvitet në të gjitha qytetet shqiptare si Ulqin, Tuz, Guci, kurse ato kroatë dhe turk, në qytete të tjera në veri të vendit”. /tesheshi.com/
