Kanë shkaktuar përplasje të mëdha deklaratat e kryeministrit Edi Rama dhe presidentit Hashim Thaçi për mundësinë e bashkimit Shqipëri-Kosovë nëse BE ndalon zgjerimin për Ballkanin.
Moska ka reaguar zyrtarisht kundër Ramës me anë të një deklarate të Ministrisë së Jashtme, ndërsa portali propandistik Sputnik thekson se Edi Rama dhe Hashim Thaçi nuk janë aq “trima” sa të flasin me mendjen e vet por janë të nxitur nga Uashingtoni dhe Brukseli.
Në një shhkrim të gjatë ku publikohet një foto jashtë normave etike, e marrë nga një frame prej përqafimit ndërmjet Hashim Thaçit dhe Federica Mogherinit, Sputnik thekson se “bashkimi i Shqipërisë dhe Kosovës është pjesë e kontekstit të krijimit të shteteve etnike, e cila në mënyrë të pashmangshme do të shkaktonte një efekt domino në rajon. Faktori shqiptar nuk luan vetëm, kështu që duket se kjo është një lojë që është në përputhje me Brukselin dhe Uashingtonin”.
Sipas Sputnik, përsëritja e deklaratave nga Rama dhe Thaçi brenda 48 orëve nuk është aspak rastësi.
Behlul Beqaj, një analist nga Prishtina, thekson për Sputnik se “në politikë gjithçka është e mundur. Çështja e mbijetesës mund të sjellë rikthimin tek pikëpyetja historike që do të vijmë tek një shkrirje e dy shteteve apo do të ndodhë një tronditje tjetër si pasojë e ndërhyrjes serbe”.
Beqaj paralajmëron se ky sindrom po përhapet në pjesën tjetër të rajonit.
“Është një problem i madh si strategjikisht dhe politikisht për të realizuar bashkimin eventual. Në kuadër të krijimit të shteteve etnike, unë mendoj se kjo do të shkaktonte një efekt domino në rajon. Nëse parashikimi im është i saktë, do të kemi një problem, por potencialisht kemi mundësinë e krijimit të disa shteteve të tjerë”, thotë ai.
Ndërkaq Sputnik thekson se Brukseli hesht duke nxitur qëndrime të tilla.
Dejan Miroviç, profesor i të drejtës ndërkombëtare në Universitetin e Prishtinës, thekson se bashkësia ndërkombëtare ka dhënë “dritën e gjelbër”.
“Përvoja ka treguar se faktori shqiptar nuk luan vetëm. Prandaj, mua më duket se kjo është një lojë që është në përputhje me Brukselin apo Uashingtonin. Kosova nuk është një entitet i njohur ndërkombëtarisht. Nuk është anëtare e OKB-së , thotë ai. /tesheshi.com/
