Ekstremizmi i ekstremit të djathtë është kërcënimi më i madh për demokracinë gjermane dhe votuesit duhet ta kenë parasysh këtë përpara se të votojnë për partinë nacionaliste, anti-imigruese Alternativa për Gjermaninë (AfD), tha agjencia gjermane e inteligjencës (BfV).
AfD aktualisht ka 18 deri në 20 për qind të votave në mbarë vendin dhe është në rrugën për të fituar tre zona elektorale në Gjermaninë lindore me një fushatë që përfshin ndalimin e migracionit si dhe frenimin e asaj që ata besojnë se është një axhendë e shtrenjtë e gjelbër, raporton Reuters.
Kreu i BfD, Thomas Haldenwang, thotë se partitë e ekstremit të djathtë po fitojnë forcë në të gjithë Evropën, por se ngritja e AfD-së është veçanërisht e ndjeshme në Gjermani për shkak të së kaluarës naziste të vendit.
“Pjesë të AfD-së përhapin urrejtje dhe agjitacion kundër të gjitha pakicave në Gjermani, veçanërisht emigrantëve, dhe promovojnë një qëndrim antisemitik,” tha ai në një konferencë për shtyp ku prezantoi raportin vjetor të vitit 2022.
“Ndikimi i Moskës”
Haldenwang vuri në dukje se pjesë të AfD janë gjithashtu “të ndikuara shumë nga Moska dhe vazhdojnë të përhapin narrativat ruse, veçanërisht në lidhje me luftën në Ukrainë”.
“Unë mendoj se të gjitha këto janë rrethana që votuesit gjermanë duhet të kenë parasysh kur marrin vendimin e tyre,” tha ai.
Agjencia britanike thekson se AfD kundërshton sanksionet ekonomike kundër Moskës, ndryshe nga partitë kryesore gjermane, duke përfshirë socialdemokratët në pushtet të kancelarit Olaf Scholz, të cilët mbështesin fuqishëm Ukrainën në luftën e saj kundër forcave ruse.
Raporti tha se numri i njerëzve të përfshirë potencialisht në aktivitetet e ekstremit të djathtë në Gjermani u rrit me 14.5 për qind në 38,800 në vitin 2022, ndërsa numri i aktivistëve të ekstremit të djathtë që dëshirojnë të përdorin dhunë u rrit nga 13,500 në 14,000.
Sipas një sondazhi të publikuar nga INSA këtë javë, AfD ka 20 për qind të sondazhit kombëtar, po aq sa SPD, ndërsa CDU e qendrës së djathtë është përpara tyre me 26.5 për qind. /tesheshi.com/
