Nga Blendi Gashi
Të premten më 8 prill në sheshin kryesorë të Prishtinës “Skëndërbeu” do të organizohet ceremonia e pranim-dorëzimit të detyrës së presidentit të Republikës së Kosovës, nga Atifete Jahjaga te Hashim Thaçi.
Mbi 500 mysafir, president të rajonit e burrështetas pritet të marrin pjesë në këtë ceremoni. Deri më tani raportohet se pjesëmarrjen e kanë konfirmuar 50 përfaqësues të shteteve.
Kjo ceremoni është paraparë të nisë në orën 11:00 një ditë pasi që presidenti i ri i vendit të jap betimin përpara deputetëve të Kuvendit të Kosovës.
Kjo do të jetë hera e parë që Kosova organizon një ceremoni të tillë.
Megjithatë, organizimi i kësaj ceremonie ka ngjallur reagime të shumta, jo vetëm nga partitë opozitare por edhe të njohësve të rrethanave politike në vend.
Hasmëria mes partive në pushtet dhe atyre në opozitë si dhe incidentet që janë shënuar muajt e fundit, konkretisht ditën kur u zgjedh Thaçi president, janë dëshmia më e mirë se ceremonia në fjalë është një provokim i radhës që lehtësisht mund të shndërrohet në arenë përleshje dhe atë para syve të shumë miqve ndërkombëtarë, incident që do të dëmtonte edhe më shumë imazhin e vendit.
Por, Thaçit aspak nuk i bëjnë përshtypje komentet e rivalëve të tij politik, përkundër se një organizim i tillë mund të sjell tensione.
Opozita kosovare ende nuk ka treguar nëse do të ndërmarrë ndonjë aksion ditën e premte kur edhe do të bëhen ceremonia në shesh, por e quan provokim ceremoninë në fjalë, pasi thotë se nuk është në interes të opinionit publik.
Ndërkaq, policia e Kosovës thotë se është e përgatitur për të marrë të gjitha masat e nevojshme për të ofruar siguri ditën kur Thaçi do të inaugurohet president.
Thaçi: S’do të ketë asnjë incident
Presidenti në ardhje, Hashim Thaçi, në një intervistë dhënë për mediat shqiptare ka thënë se nuk ka vend për shqetësim sepse është një process i zakonshëm.
“Nuk kam kurrëfarë droje që ka me pas ndonjë incident, sepse nuk ka asnjë arsye. Ky është një moment i procesit të zgjedhjes së Presidentit krejt i zakonshëm, procedurial dhe ligjor”, ka deklaruar Thaçi.
Inaugurimi në shesh i presidentit, nuk i shërben interesit publik
Zëdhënësi i Vetëvendosje-s, Frashër Krasniqi, ka thënë për tesheshi.com se inaugurimi glamuroz në shesh i presidentit, shpreh vetëperceptimin absurd të Thaçit për “madhështinë” e tij, dhe nuk i shërben në ndonjë formë interesit publik e shtetëror të Kosovës.
“Zgjidhja e Thaçit për president është e papranueshme dhe shpreh kapjen e shtetit në majen e tij. Në fund të fundit, as imazh i mirë për ne nuk do të jetë fakti që në krye të shtetit e kemi personin më të korruptuar e kriminalizuar të vendit. Sidoqoftë, ne mendojmë që problemi kryesor në Kosovë është qeveria e Kosovës dhe projektet e saj dhe fokusi ynë do të jetë në kundërshtimin e kësaj qeverie në javët e muajtë vijues”, ka thënë Krasniqi, për tesheshi.com.
Ndërsa, nënkryetari i Aleancës për Ardhmërinë e Kosovës, Ahmeti Isufi, ka thënë për mediat se ceremonia e pranim-dorëzimit të presidentit duhet të bëhet veç në Kuvend e jo në sheshe.
“I patëm thënë kryje ceremoninë në Kuvend e mos bë cirkuze tjera”, ka deklaruar Isufi. I pyetur se a do të marrë pjesë opozita në ceremoninë e inaugurimit, Isufi me ironi është përgjigjur “Veç nëse i bëjmë vet edhe ne ftesat”.
Policia në gjendje gatishmërie
Policia e Kosovës, përmes një përgjigjeje me email dërguar për portalin tesheshi.com thotë se është e përgatitur t’i ndërmarr masat e nevojshme.
“Policia e Kosovës bazuar në autorizimet e saja ligjore do të ndërmerr të gjitha masat e nevojshme ligjore për ofrimin e sigurisë, ruajtjes së rendit dhe qetësisë publike”, thuhet në përgjigjen e Policisë.
