Nga Blendi Gashi
Tre krerët e institucioneve, presidenti Thaçi, kryeministri Haradinaj e kryeparlamentari Veseli siç duket nuk e kanë ndërmend të dëgjojnë thirrjen e ndërkombëtarëve për të mos shfuqizuar Gjykatën Speciale.
Pas dy tentativave të dështuara të premten mbrëma, pasi Kryesia e Kuvendit nuk kishte kuorum të marrë vendim për mbajtjen e seancës së jashtëzakonshme, kërkesë kjo e 43 deputetëve, drama pritet të vazhdojë sot ku qeveria ka thirrur mbledhjen e qeverisë në ora 14:00.
Me këtë mësymje “tre musketerët” po tregojnë qartë se primar e kanë interesin personal e jo shtetëror, pasi nuk ua vënë fare veshin paralajmërimeve të ambasadorëve amerikan, britanik e gjerman por edhe Bashkimit Evropian se nëse merret një vendim për të shfuqizuar Specialen, Kosova do izolohet globalisht.
“Mos e ktheni orën mbrapa”, tha ambasadori amerikan Greig Delawie. “Vendimi për ta shfuqizuar Specialen shkatërron Kosovë”, paralajmëroi ambasadori britanik Ruairi O’Connell.
Këto janë mesazhe të qarta se nëse Specialja shfuqizohet, persona që janë në listë për tu arrestuar mund të shpëtojnë për një kohë të caktuar, por dëmet që do i sillnin vendit do jenë fatale.
Pra sot mund të vendoset nëse Kosova do ta kthejë orën pas dhe do hedh në baltë gjithë ato të arritura që u bën 17 vjetët e fundit, apo do ec përpara në rrugëtimin e saj euroatlantik.
Pasojat e një vendimi dhe pse Specialja mbetet në aksion
Nëse veç ora kthehet pas, pra merret vendimi që të shfuqizohet Specialja, Kosova do të kthehet prapa në kursin e saj euroatlantik dhe do të dëmtojë marrëdhëniet me miqtë e saj më të afërt, ku mund të ndodh vende të caktuara të tërheqin edhe njohjet.
Kosova më nuk do të merret si shtet serioz dhe do të konsiderohet nga bashkësia ndërkombëtare si shtet mashtrues.
Pasojë tjetër e madhe është se Specialja do formohet nga Këshilli i Sigurimit i OKB-së, ku do të rikthehet në veprim fuqishëm rezoluta 1244 e OKB-së, kjo ka qenë arsyeja edhe pse është themeluar vet nga institucionet e Kosovës.
Mësohet se e gjitha kjo mësymje e pushtetit për ta rrëzuar Specialen lidhet me informacionet që liderët politikë kanë se aktakuzat e para do të shpallen në prag të krishtlindjeve edhe pse nuk dihet saktësisht se kush do të arrestohet. /tesheshi.com/
