Shirat e rrëmbyeshëm dhe breshëri ka bërë që një pjesë e madhe e Spanjës të përfshihet nga vërshimet të cilat sollën edhe pasoja njerëzore.
Së paku një person thuhet të ketë humbur jetën si pasojë e motit të lig që përfshiu këtë pjesë të Evropës jugore.
Moti ekstrem i zuri në befasi edhe shërbimet publike të vendit, pasi ishin parashikuar shira katër herë më të lehta.
Videot e publikuara në rrjete sociale flasin për ujëra të rrëmbyeshëm që kanë pushtuar autostradat dhe rrugët kryesore, të cilat janë dëmtuar gjithashtu.
Shirat gjithashtu ndërprenë eventin e ngasjes së demave në Pamplona, një ngjarje e përvitshme që ngjall interes në Spanjë dhe jo vetëm.
Moti me shi vjen vetëm një javë pasi Spanja iu nënshtrua një vale të nxehtësisë rekorde që përfshiu pothuajse gjithë Evropën Perëndimore. /tesheshi.com/
