Spanja është skuadra e parë finaliste në kampionatin Europian të Basketbollit. Iberikët kështu shuan ëndrrën e Francës për ta fituar në shtëpi titullin e shumëkërkuar. Një ndeshje me plot adrenalinë, gjatë së cilës spanjollët shkurtuan disavantazhin prej 11 pikëve të francezëve e në fund e fituan ndeshjen (80-75).
Paul Gasoll ishte lokomotiva e Spanjës në këtë duel, duke ia dalë të realizojë 40 pikë. Për më tepër, ai shënoi pikët vendimtare që skuadra e tij të arrinte të përmbyste Francën. Kështu Spanja i kthen hakun Francës duke e eleminuar në shtëpi, pikërisht ashtu si kishin bërë francezët vitin e shkuar në këtë faze të garave në kampionatin Botëror që u mbajt në Madrid.
“Vitin e shkuar ishte e vështirë për ne të humbasim në këtë fazë të garave e para se të gjithash në shtëpi. Por, ne kemi punuar shumë dhe jemi këtu ku jemi sot”, theksoi pas ndeshje heroi i takimit, Paul Gasol.
Spanja do të presë në finale fituesin nga dueli tjetër gjysmëfinal; Serbi – Lituani. /tesheshi.com/
