Zyrtarët amerikanë po përgatisin një dokument zyrtar që njeh sovranitetin izraelit mbi Lartësitë Golan dhe presidenti Donald Trump ka të ngjarë ta nënshkruajë atë javën e ardhshme, tha një zyrtar i lartë i administratës.
Trump tha më parë se ishte koha për të njohur sovranitetin izraelit mbi Lartësitë Golan, territorin sirian që Izraeli e pushtoi në Luftën e Lindjes së Mesme në 1967.
Trump pritet të nënshkruajë një dokument kur kryeministri izraelit Benjamin Netanjahu të mbërrijë në Uashington të hënën, tha zyrtari.
Njohja e zonës së diskutueshme do të përbënte një ndryshim të madh në politikën amerikane.
Veprimi i Trump u dënua nga qeveria siriane, e cila tha se ishte e vendosur të rimarrë këtë zonë “me të gjitha mjetet e disponueshme”.
“Kombi sirian është edhe më i vendosur të çlirojë këtë pjesë të çmuar të territorit kombëtar sirian me të gjitha mjetet e mundshme”, tha burimi, duke shtuar se deklarata e Trump ishte “e papërgjegjshme” dhe se ajo tregoi “përbuzje” të ligjit ndërkombëtar.
Lidhur me deklaratën e Trump, edhe Ministria e Punëve të Jashtme ruse reagoi me anë të zëdhënëses Maria Zaharova, duke thënë se se ndryshimi i statusit të Lartësive Golan do të përbënte një shkelje të drejtpërdrejtë të vendimeve të Kombeve të Bashkuara.
Edhe televizioni iranian raportoi se Teherani e konsideron një vendim të papranueshëm atë të SHBA për të njohur sovranitetin izraelit mbi Golanin. /tesheshi.com/
