Partia Demokratike do të mbledhë pasditen e sotme grupin parlamentar, një ditë para seancës konstituive, për të përcaktuar strategjinë, por edhe për të zgjedhur kryesinë e grupit dhe propozuar kandidatin e saj për nënkryetar të Kuvendit.
Sikundër raportohet mbledhja do të zhvillohet në selinë e PD në orën 18:00.
Megjithëse ende nuk ka një propozim zyrtar, të paktën publik, mbi emrat që do të përfaqësojnë PD në nivelet e larta parlamentare, ka zëra se grupi parlamentar mund të drejtohet nga një grua, ndërsa nënkryetari i Kuvendit mund të zgjidhet mes Dhurata Çupit, Tritan Shehut, Edmos Spahos dhe Aldo Bumçit.
Të katër emrat që diskutohen, të paktën jo zyrtarisht, për postin e nënkryetarit të Kuvendit nuk shquhen për konflikte apo gjuhë të ashpër politike, çka është një sinjal se legjislatira e re, mund të mos jetë aq e ashpër sa pritet.
Nënkryetari i Kuvendit, në bazë të rregullores, mund të drejtojë seancat parlamentare kur mungon kryetari ose kur ky i fundit mund t´ia delegojë të drejtën për shkak të takimeve, lodhjeve etj.
Por referuar faktit që në krye të Parlamentit do të votohet Gramoz Ruçi, i cili shquhet për pjesëmarrje në nivele mbi 95 % gjatë punimeve të Kuvendit, shanset që nënkryetari të drejtojë punimet janë minimale.
Ndërkohë interesant është fakti se kush do të jenë drejtuesit e grupit parlamentar demokrat. Në legjislaturën e kaluar, Edi Paloka u komandua në krye të grupit ndërsa në kryesinë e tij ishin Jorida Tabaku dhe Gent Strazimiri. Por kryesisht peshën më të madhe në debatet politike e ka mbajtur ish-kryeministri Sali Berisha, i cili nëse do të vijojë me të njëjtin ritëm edhe në këtë legjislaturë, drejtuesit e grupit do të jenë thjeshtë figura.
Ka zëra se Basha mund të propozojë për kryetare të deputetëve demokratë, Grida Dumën, dhe kjo mund të jetë një strategji e mirë, duke pasur parasysh se socialistët kanë piketuar Taulant Ballën. Duma në jo pak raste ka treguar agresivitet, është konsideruar ylli në ngjitje i PD-së, edhe pse kuotat e saj politike ranë ndjeshëm pas humbjes me mbi 10 mijë vota për Bashkinë e Durrësit, përballë Vangjush Dakos, që ishte në kërkim të mandatit të 3-të si kryebashkiak.
Gjithsesi pasditja e sotme do të konfirmojë nëse kreu demokrat do të shkojë drejt një propozimi të tillë, apo do të mbajë të njëjtën kryesi të grupit parlamentar, me Edi Palokën kryetar. /tesheshi.com/
