Këtë mbrëmje nisin ndeshjet e kthimit të një të tetave të Champions League-s, prej nga do të përcaktohen dhe skuadrat çerekfinaliste të aktivitetit.
Në malore është kjo mbrëmje për dy skuadrat pritëse, Napolin dhe Arsenalin, që përballë kundërshtarëve të tillë si Reali i Madridit dhe Bajerni i Mynihut do të duhet të luajnë në mënyrë të përsosur për të shpresuar për kualifikimin.
Rezultatet e ndeshjeve të para nuk japin shumë shpresë, posaçërisht për Arsenalin. “Topçinjtë” u mposhtën 5-1 më 15 shkurt në “Allianz Arena” nga një Bajern i papërmbajtshëm. Veç humbjes së thellë, përballja vjen në një moment aspak të mirë për Arsenalin, që të shtunën humbi në Premier League ndaj Liverpulit.
Në të njëjtën fazë të veprimtarisë, Arsenali do të eliminohej po nga Bajerni i Mynihut tre sezone të shkuara. “Nuk kemi asnjë alternativë tjetër, veçse ta sulmojmë Bajernin,” deklaron Arsene Wenger, që një eliminim i mundshëm sonte do t’ia shtojë hallet akoma më shumë.
Interpretimi i shkëlqyer i ndeshjes të së shtunës ndaj Romës dhe fitorja në “Olimpico” e bën Napolin optimist për përballjen me Realin e Madridit.
Madrilenët fitonin 3-1 në takimin e parë, ku më së pari do të kalonin në epërsi napolitanët. Shifrat e kësaj sfide e lënë të hapur gjithçka, me kualifikimin të mundur për çdo skuadër.
Zinedine Zidane ka paralajmëruar se do të luajë me formacionin më të mirë; homologu i tij, Maurizio Sarri, deklaron se presioni është mbi madrilenët.
Në Londër do të gjykojë një treshe gjyqtarësh grekë, me kryesor Tasos Sidiropoulos-in. Gjykimi në Napoli i është besuar turkut Cüneyt Çakır. /tesheshi.com/
