Ora e së vërtetës po afron në Champions League. Sonte në 20:45, dy ekipet e Madridit do të vihen përballë për herë të dytë, në kërkim të përmbushjes të të njëjtit objektiv: fitimit të trofeut të Champions-it.
Atletiko do të ketë rastin më të mirë për t’u hakmarrë për atë humbje të pamerituar dy vite të shkuara. Veç kësaj, fitimi i Champions-it do të ishte kulmi i shndërrimit të një skuadre, që në këto vite njeh vetëm ngjitje.
Nëse dy vite të shkuara luhej në Lisbonë, këtë herë është Milanoja që do t’i presë dy skuadrat madrilene. Nëse atëherë ishte holandezi Bjorn Kuipers që e gjykonte finalen, sonte do të jetë anglezi Mark Clattenburg.
Reali kërkon trofeun e 11-të, Atletiko të parin. Reali kërkon të bëjë histori me një tjetër trofe rekord në këtë aktivitet, Atletiko kërkon të hyjë në histori me trofeun e parë të Champions-it të fituar.
Askush nuk e di se si do të shkojë kjo finale, por ia vlen të kujtojmë se si rrodhën ngjarjet në finalen e sezonit 2013-2014.
Reali i Madridit fitoi 4-1 atë mbrëmje të 24 majit 2014, por rezultati nuk të thotë asgjë për atë finale dramatike. Atletiko kryesonte gjer në minutën e 93-të, falë një goli të Diego Godin-it, të shënuar në minutën e 36-të. Por një tjetër mbrojtës e kthen lojën pikërisht në atë moment. Sergio Ramos i çon shifrat në 1-1.
Të shkurajuar prej çka u kishte ikur prej duarsh në pak sekonda, lojtarët e Atletikos thuajse nuk reagojnë fare në shtesa. Kundërshtarët e Realit shënojnë tre gola. Bale, Marcelo e Ronaldo i japin fitoren e pamenduar Realit: 4-1!
Ç’do të ndodhë sonte? Prapë fati do të tregohet i pamëshirshëm me Atletikon? Të shohim! Vetëm pas disa orëve, sonte në mbrëmje! /tesheshi.com/
