Sipas hulumtimeve të bëra në Kosovë dhe Shqipëri nga Fondacioni i Kosovës për Shoqëri të Hapur (KFOS) dhe Fondacioni i Shoqërisë së Hapur për Shqipërinë (OSFA), 74.8 përqind e të anketuarve në Shqipëri do të votonin pro bashkimit kombëtar në një referendum të mundshëm, ndërsa në Kosovë kjo përqindje është më e ulët dhe qëndron në 63.9 përqind.
Hulumtimi adresoi një numër çështjesh me interes për të dy vendet, por u përqëndrua në çështjen e vazhdueshme të bashkimit të dy vendeve, ose ndryshe të unifikimit kombëtar .
Sondazhi tregon se vizitat e qytetarëve nga të dy anët e kufirit janë rritur ndjeshëm, veçanërisht pas ndërtimit të Rrugës së Kombit, ku veçohet fakti se se qytetarët e Kosovës janë ata që po vizitojnë më shumë Shqipërinë.
Uniteti kombëtar është veçanërisht i shprehur në zonat urbane, si në Shqipëri ashtu edhe në Kosovë.
Arsyet kundër unifikimit janë të ndryshme, por besimi se të dy shtetet si shtete të ndara funksionojnë më mirë duket se mbizotëron.
Në të njëjtën kohë, të anketuarit në Shqipëri që besojnë se unifikimi është i mundur, thonë se faktori kryesor në zbatimin e tij do të jetë komuniteti ndërkombëtar, ndërsa në Kosovë ata ndajnë besimin se një skenar i tillë mund të zbatohet vetëm nga drejtuesit e dy vendeve. /tesheshi.com/
