Rrjeti i mirënjohur informativ britanik BBC jep një përmbledhje të reagimeve të autoriteteve në botë mbi sulmet e fundit në kryeqytetin e Britanisë, të shoqëruara me humbje jetësh e me lëndime të dhjetëra personave.
“Jemi me ju,” ka qenë reagimi i presidentit amerikan Donald Trump, që ka shfrytëzuar rastin për t’u bërë thirrje gjykatave amerikane ta lënë në fuqi urdhrin e tij për ndalimin e hyrjes në SHBA të personave nga gjashtë vende me shumicë dërrmuese muslimane.
Presidenti i ri i Francës ka shprehur kuptueshëm solidaritetin me Britaninë pas kësaj ngjarjeje.
“Përballë kësaj tragjedie të re, Franca është më shumë se kurrë në anën e Britanisë,” është reagimi i Emmanuel Macron-it.
Një deklaratë e kancelares gjermane Angela Merkel thotë në këtë kontekst: “Sot jemi të bashkuar këtej e andej kufijve… në vendosmëri. Për Gjermaninë, e përsëris se në luftën kundër të gjitha formave të terrorizmit, ne jemi patundshmërisht në anën e Britanisë.”
“Mendimet dhe lutjet janë për viktimat dhe familjet e tyre,” është shprehur presidenti i Komisionit Europian, Jean-Claude Juncker.
Departamenti amerikan i Shtetit ka reaguar kësisoj në deklaratën e posaçme: “Shtetet e Bashkuara janë gati të japin çdo ndihmë që mund të kërkojnë autoritetet në Mbretërinë e Bashkuar.”
Kryeministri kanadez, Justin Trudeau, ka shkruar në rrjetet sociale, “Lajme të tmerrshme sonte nga Londra. Po mbikëqyrim situatën.” /tesheshi.com/
