Pas përplasjes së ashpër ndërmjet Turqisë dhe Rusisë mbi Sirinë dhe incidentin në ajër me avionin rus të rrëzuar nga trupat turke, është krijuar edhe një problem ndërmjet Ankarasë dhe aleatit më të ngushtë të Moskës në Ballkan, Serbisë.
Siç bën të ditur televizioni më i rëndësishëm serb B92, janë thirrur në ministritë e jashtme respektive në mënyrë urgjente, ambasadori turk në Beograd dhe ambasadori serb në Ankara.
Raportet e fundit të publikuar në median turke për snajperistë serbë që u kapën pranë organizatës terroriste PKK dhe spiunët që punojnë për kurdët, kanë arritur që të ndezin menjëherë marrëdhëniet mes dy vendeve të cilat janë përshkruar nga të dyja palët si “më të mira se kurrë”.
Para pak javësh, në kryeqytetin serb ishte për vizitë zyrtare kryeministri turk, Ahmet Davutoglu, vizitë e cila u përcoll me një atmosferë dukshëm pozitive dhe me një mesazh për zgjerimin e bashkëpunimit.
Një shkrim i së përditshmes turke “Sabah” thekson se trupat paramilitare të PKK-së janë furnizuar me snajperistë serbë, pikërisht me snajperë të prodhimit serb, me synimin për të goditur forcat turke të sigurisë.
Ambasadori turk në Serbi zhvilloi një takim në Ministrinë e Jashtme të Serbisë dhe pas këtij takimi tha se mes dy vendeve ekziston bashkëpunimi.
“Turqia dhe Serbia janë vende srioze, ata janë duke vëzhguar dhe analizuar nga afër këtë çështje dhe janë të angazhuara të bashkëpunojnë. Ministri ynë i Brendshëm bëri një deklaratë ku theksoi se janë arrestuar disa shtetas të huaj, por fakti nëse janë serbë apo jo është spekulim mediatik. Institucionet e të dy vendeve shkëmbyen informacione për këto spekulime të cilat nuk janë informata konkrete”, tha ambasadori Mehmet Kemal Bozay.
Zëvendëskryeministri serb, Rasim Ljajiç mohoi vërtetësinë e një tjetër aferë raportuar nga shtypi turk rreth “një agjent sekret serb paraqitur si gazetar” dhe i arrestuar në zonat ku Partia e Punëtorëve Kuridstan është aktive.
“Çështja e spiunit u përgënjeshtrua shpejt sepse historia është fantashkencë e pastër dhe një fiction mediatik. Bëhet fjalë për një arrestim të një shtetasi të huaj në Turqi dhe aspak me ne. Sigurisht, disa qarqe si në Serbi dhe Turqi nuk i pëlqejnë marrëdhëniet e mira mes dy vendeve, sepse po jetojmë një periudhë shumë të mirë të raporteve tona”, tha Ljajiç.
Ekspertët thonë se takimet e papritura të ambasadorit dhe ulje-ngritjet në marrëdhëniet mes dy vendeve janë “mjaft të zakonshme”.
“Nga relacionet ekonomike mund të themi se ka shenja positive, ka takime reciproke të nivelit të lartë që dëshmojnë dialogun pokitik, por nga ana tjetër mes dy shteteve ka paragjykime të ndërsjellta që vijnë nga konteksti histori”, tha Aleksandra Joksimoviç, nga Qendra për Politikë të Jashtme, një OJF e rëndësishme.
Këto marrëdhënie arritën pikën e tyre të vlimit në tetor 2013, kur kryeministri turk Rexhep Tajip Erdogan vizitoi Kosovën e ku bëri deklaratën e famshme: “Kosova është Turqi, dhe Turqia është Kosovë!”.
Pas deklaratës, Ankaraja theksoi se citimi ishte marrë jashtë kontekstit të tij real nga ana e mediave.
Çështja e ekzistencës së armëve serbe dhe ushtarakëve që trajnojnë e ndihmojnë PKK-në kurde është një problem i vjetër që ndiqet nga shërbimet.
Tesheshi.com, para disa ditësh botoi një shkrim ku theksonte se UDB-ja ka qenë një nga ndihmueset kryesore të organizatës kurde, e cila është përdorur edhe kundër shqiptarëve. (shih:http://localhost/tesheshi/influenca-e-kurdeve-te-pkk-se-ne-shqiperi-dhe-helmimi-i-nje-diplomati-shqiptar-ne-turqi/)
Por dalja e këtij problem në media, duket se tregon se situata është serioze dhe tani ka dalë në sipërfaqe. Përgatiti: Ylli Pata – /tesheshi.com/
