Si Milani dhe Interi dolën të humbur dje në sfidat e tyre të Serisë A.
Atalanta fitoi 2-1 ndaj Milanit, në një ndeshje ku skuadra udhëtuese e pa shpejt veten në epërsi pas golit të Luiz Adriano-s, të shënuar me 11-metërsh në minutën e 5-të. Por lojtarët e Milanit do të lëshonin më pas, dhe vendasit do ta gjenin barazimin pak para se t’u drejtoheshin dhomave të zhveshjes për pushimin 15-minutësh.
Goli i fitores për Atalantën u shënua nga Gomez në minutën e 62-të.
Milani nuk fiton në kampionat prej 27 shkurtit, ditës kur mundi Torinon 1-0. Pozita e ekipit të famshëm në klasifikim nuk është aspak e kënaqshme. Milani renditet në vend të gjashtë, me 49 pikë, e për momentin nuk arrin ta sigurojë as pjesëmarrjen në Ligën e Europës për vitin e ardhshëm. Durimi me Sinisha Mihajloviçin po mbaron, por serbi mund ta shtyjë gjer në fund të sezonit. Më tutje janë të pakta mundësitë që ai ta drejtojë sërish Milanin.
Interi, në anën tjetër, humbi 1-2 me Torinon në “Giuseppe Meazza”. Një fitore do ta ngjiste Interin në vend të katërt, e do ta afronte me zonën që të çon në Champions League, por kjo nuk ndodhi.
Interi e gjeti po ashtu kryesimin shpejt me golin e Icardi-t. Pjesa e dytë do të niste keq, me Torinon që barazon përmes golit të Molinaro-s. Interi i mbetur me nëntë lojtarë pas daljes me të kuqe të Miranda-s dhe Nagatomo-s, pëson në minutën e 73-të dhe golin e dytë.
Kjo ishte humbja e tetë e Interit në tridhjetë e një javë të kampionatit italian.
Objektivat sezonalë janë larg për të dy ekipet e Milanos, që prej kohësh gjenden në ujëra të turbullta. Shkëlqimit të shkuar nuk i ka mbetur më asgjë. /tesheshi.com/
