Skuadra e Partizanit do të ketë një kampionat më tepër, duke nisur nga dita e sotme. Për herë të parë në historinë e sportit shqiptar, skuadra që mori më shumë pikë se të gjitha të tjerat në fund të sezonit të luajtur, 2015-2016, nuk do të jetë skuadra kampione.
Komisioni i Etikës në Federatën Shqiptare të Futbollit, ka shpallur fajtore skuadrën e Skënderbeut, për trukimin e disa ndeshjeve gjatë këtij sezoni, duke i hequr trofeun korçarëve.
Autoriteti shqiptar i Etikës, vendosi thuajse pas një viti, fajësinë e Skënderbeut, pasi UEFA i kishte shpallur, që në 2016-ën, duke e përjashtuar nga kupat e Europës. Por korçarët janë dënuar edhe me heqjen e 12 pikëve nga klasifikimi i sezonit të fundit, si dhe me një gjobë prej 2 milionë lekësh.
Pavarësisht heqjes së pikëve, Skënderbeu nga 72 pikë që e mbylli vitin e shkuar, zbret në kuotën e 60 pikëve, çka nuk ia ndryshon renditjen në vendin e tretë. Heqja e titullit për Skënderbeun, nënkupton edhe titullin kampion për Partizanin, që sezonin e kaluar u rendit i dyti. Për demat e kuq, palmaresi i trofeve kampion, shtohet me trofeun e 16-të. /tesheshi.com/
