Skuadra korçare e Skënderbeut mbërriti dje në tokën kroate dhe është akomoduar në hotelin “Sheraton” të Zagrebit. Tekniku Mirel Josa ka shfrytëzuar terrenin në Maksimir, arenën ku do të zhvillohet edhe beteja e dytë për të parë nga afër për herë të fundit disponimin e futbollistëve të tij.
Në konferencën para ndeshjes Josa e cilësoi si të hapur ndeshjen dhe beson që skuadra e tij mund të bëjë të njejtën gjë që e bëri Dinamo në Shqipëri.
“Trajneri i Dinamos tha se shanset janë 50-50. Unë kam të njëjtin mendim. Dinamo na mundi në shtëpi, por unë mendoj se ne kemi të njëjtën mundësi. Përsa i perket Olainkës, ai nuk do të luajë nga fillimi, pasi ka qenë larg ekipit për një kohë të gjatë, sepse unë nuk e di gjendjen e tij fizike. Ju keni lojtarë të mirë si Sudani, Mashado apo Pjaca”, tha Josa në konferencën e fundit para ndeshjes.
Ndërkohë edhe kapiteni Bledi Shkëmbi beson në kualifikimin, madje ai kujton të kalurën kur kishte mundur njëherë Dinamon në Maksimir kur ishte në përbërje të Rijekës.
“Jam i vetëdijshëm që do ta kemi të vështirë këtu në Maksimir, por kujtoj që kur luajta një herë me Rijekën fituam ndaj Dinamos dhe për ne nuk do të jetë hera e parë nëse e arrijmë diçka të tillë. Megjithatë keni lojtarë të mrekullueshëm si Pjaca apo Çoliç, të cilët janë tepër të rinj, por loja e tyre është si e një futbollisti me përvojë”, deklaroi kapiteni Shkëmbi për gazetarët kroatë.
/tesheshi.com/
