Dy ekipet e kreut në kampionatin shqiptar të futbollit, Skënderbeu dhe Partizani, kanë fituar me të njëjtin rezultat, 1-0, këtë mbrëmje të së hënës ndaj Tiranës dhe Kukësit. Takimet ishin në kuadër të javës së njëzet e dytë të Superligës.
Skënderbeu priti në fushën e vet Tiranën, ndaj së cilës kishte triumfuar në të dy takimet e mëhershme. Korçarët e kontrolluan tërësisht pjesën e parë të lojës, por pa mundur të krijojnë raste të pastra shënimi për shkak të rreshtimit të ngjeshur të kundërshtarit në mbrojtje. Ndryshe tyre, kryeqytetasit thuajse nuk e kaluan asnjëherë gjysmëfushën e tyre.
E kundërta ndodhi në 45 minutat e dyta, me fillimin e të cilave është Tirana që ngulmon. Një seri sulmesh të miqve krijuan pështjellim te vendasit, por vetëm kaq. Ndërsa loja u barazpeshua, korçarët bënë përpara. Dy goditje dënimi të njëpasnjëshme nuk dhanë rezultat, por fill pas tyre vjen momenti kur gjyqtari i ndeshjes jep një 11-metërsh për një ndërhyrje të gabuar ndaj Salihit. Eshtë vetë ai, golashënuesi më i mirë i kampionatit, që godet mjeshtërisht nga pika e bardhë në minutën e 75-të dhe shënon. Goli i Salihit i jep epërsinë Skënderbeut, që më pas ruan rezultatin. Orges Shehi, portieri i korçarëve, spikat me dy pritje vendimtare, dhe në fund takimi mbyllet 1-0.
Një tjetër shkodran, Xhevahir Sukaj, i dha fitoren Partizanit në “Qemal Stafa” ndaj Kukësit. Të kuqtë e dominuan lojën, për të kaluar në avantazh në pjesën e dytë, në minutën e 50-të, kur Sukaj goditi saktë me kokë brenda zonës, duke e detyruar gardianin e portës kundërshtare ta nxjerrë topin nga rrjeta. Rezultati 1-0 nuk ndryshoi gjer në fund të ndeshjes.
Tre pikët e fituara nga Skënderbeu dhe Partizani i mbajnë ato në vend të parë dhe të dytë në klasifikim, me katër pikë diferencë mes tyre. /tesheshi.com/
