Protestat e shpërthyera në Serbi për rritjen e çmimeve, qeveria i shikon si skenar që vjen nga jashtë. Madje ministri i Mbrojtjes Aleksandar Vulin e cilësoi as më pak e as më shumë por një “skenar ukrainas”.
“Pas pak ditësh askush nuk do ta mbajë mend karburantin, pasi do të keni kërkesa për dorëheqjen e qeverisë, presidentit të Republikës, askush nuk do të kujtojë pse filloi”, tha Vulin për të përditshmen “Alo”.
Ai shtoi se policia në Serbi nuk do të vendosë ndonjë kordon dhe do të kujdeset për respektimin e ligjit, “por nuk do të rrezikojë askënd në asnjë mënyrë, pasi ata po tregojnë durim dhe nivel të lartë”. Vulin parashikoi gjithashtu krijimin e një “koalicioni mediatik” që do të “lëvizte për të rrëzuar” qeverinë.
Ministri i Mbrojtjes tha se fotoja e një vajze që i jep lule një shoferi kamioni ishte identike si fotografitë në Ukrainë, Rumani dhe Sllovaki për t’u kthyer si një simbol i protestës. “Ata përdorin pikërisht të njëjtat metoda. Nuk mund të presësh që të ndodhë e njëjta gjë në Serbi dhe për pasojat që të mos jenë të njëjta si në Maidan, ku pothuajse shpërtheu një luftë civile”, tha Vulin.
Këto protesta kanë shpërthyer përpara një referendum që pritet të zhvillohet në Serbi në lidhje me heqjen e Kosovës nga preambula e Kushtetutës. Por Vulin nuk përcaktoi nëse këto inskenime po nxiten nga Perëndimi apo nga Moska. /tesheshi.com/
