Në prag të zgjedhjeve parlamentare të 25 qershorit kanë nisur të zbulohen skemat e vjedhjes së votave. Sërish në grackën e hetimeve ka rënë një njeri i Lëvizjes Socialiste për Integrim.
Administratori i Njësisë bashkiake nr. 2. Elez Gjoka, është paditur në prokurori pasi akuzohet se ka regjistruar fiktivisht rreth 60-70 shtetas shqiptarë në zgjedhje.
Të gjithë këta votues potencialë në Tiranë “banojnë” në shtëpinë e tij pasi janë rregjistruar me të njëjtin kod banimi që përkon me banesën në pronësi të zyrtarit vendor.
“Nga hetimet e kryera, dyshohet se transferimi i gjendjeve civile të këtyre shtetasve dhe rregjistrimi i tyre pranë Njësisë Bashkiake nr 2, është kryer me qëllimin ndikimin në zgjedhjet e përgjithshme që do të zhvillohen në Republikën e Shqipërisë në datë 25.06.2017, duke u premtuar këtyre shtetasve vende pune në këmbim të votës” informon policia e Tiranës.
Materialet proceduriale iu kaluan Prokurorisë së Rrrethit Gjyqësor Tiranë, për veprat penale “Detyrimi për pjesëmarrje në veprimtari politike”, “Korrupsioni pasiv në zgjedhje” dhe “Falsifikimi i dokumenteve”, parashikuar nga nenet 328/a, 328/b dhe 186/3 të Kodit Penal.
Zbardhja e skemës së manipulimit vjen në vazhdën e disa shkarkimeve të zyrtarëve të kësaj partie pasi akuzohen për përfshirje të kundraligjshme në fushatë zgjedhore.
LSI akuzon dy partitë e mëdha PS e PD se po e sulmojnë për arsye elektorale. /tesheshi.com/
