Kreu demokrat Basha shpalli synimin për të rihyrë në sistem e për t’u ballafaquar me votë me mazhorancën nën drejtimin e Ramës. Në një mbledhje me kryesinë e PD-së pasditen e së enjtes, ai konturoi dëshirën për të patur një KOP të ri, si në muajt e fundit të opozitës së Berishës në 2005-n, aty ku dhe ai u njoh për herë të parë, si emër e portret.
“Vëmendje e veçantë për hapjen e partisë. Eshtë momenti që të mirëpresim këdo që kundërshton regjimin e Ramës, që është në opozitë me të dhe kërkon të kontribuojë”, tha Basha.
“Brenda janarit do të përfundojë hartimi i alternativës sonë, në mënyrë konkrete, me përllogaritje për çdo fushë, çdo sektor, për çdo grup shoqëror… Të gjithë duhet ta dinë sot si do të jetë situata e tyre në qeverinë tonë”, theksoi kreu demokrat.
Po si do rihyjë Basha në sistem? Nëpërmjet pjesëmarrjes në Reformën Zgjedhore. Por duke vënë kushtin të zgjedhjet, si parlamentare e si lokale, të jenë të parakoshme e brenda një dite.
Pas festave, do të prezantojmë para qytetarëve propozimet tona për Reformën Zgjedhore dhe kërkojmë që brenda muajit janar të miratohet reforma dhe t’i hapet rrugë zgjedhjeve vendore dhe të përgjithshme sa me shpejt”, deklaroi Basha, duke shpallur kështu rënien e kauzës “me Ramën kryeministër s’ka zgjedhje”.
Por a do mundet t’i bëjë realitet të parakohshmet? Për momentin s’ka asnjë sinjal në horizont që kjo mund të ndodhë. Aq më pak dy lloj në një ditë. /tesheshi.com/
