Skandali i shitblerjeve të ndeshjes që është lidhur së fundmi me klubin e Katanias rrezikon të zgjerohet.
Sipas “Gazzetta dello Sport”, kjo valë trukimesh mund të përfshijë edhe skuadrat e Karpit, Breshias, Barit, por edhe Çitadelës.
Në shënjestrën e investiguesve ka përfunduar mbi të gjitha barazimi 0-0 mes Karpit dhe Katanias, duke qenë se kjo sfidë ishte eliminuar nga kompanitë e basteve, pasi këto të fundit kishin vënë re një lëvizje anormale të shumave të mëdha që ishin vendosur mbi këtë rezultat. Në përgjimet që vazhdojnë të investojnë prokurorët dhe policia spikat gjithashtu edhe një komunikim i Kristiano Xhuntolit, ishdrejtori sportiv i emilianëve, i sapoemëruar në krye të Napolit.
Premisat e këtij investigimi, që dërgoi në pranga 7 persona, mes të cilëve edhe presidentin e Katanias, Antonino Pulvirenti, mund të rezervojnë të tjera surpriza. Ai që ka nisur të dridhet është edhe klubi i Karpit, i cili sapo ka siguruar ngjitjen historike në Serinë A. Ai që fut në telashe klubin emilian është një përgjim në të cilin drejtori sportiv i Katanias, Daniele Deli Karri, i kujton homologut të tij të Karpit, Kristiano Xhuntoli, se “i detyrohet një nder”.
Dhe si me magji, takimi i vlefshëm për javën e fundit të Serisë B përfundon 0-0 duke i dhuruar Katanias mbijetesën matematikore në këtë kategori. Me sa duket, bëhet fjalë për një barazim të paracaktuar, që nëse konfirmohet me fakte ta pakthyeshme, atëherë mund t’i sjellë disa pikë penalizim Karpit në aventurën që pritet të nisë në Serinë A. Por edhe pse ky i klubit emilian është rasti më i bujshëm, ky skandal nuk pritet që të përfundojë me kaq. Ajo që rrezikon jo pak është edhe Breshia, një prej skuadrave që mund të “ripeshkohet” dhe të ringrihej sërish në Serinë B, në rast të një dënimi të Katanias, me zbritjen në një kategori më poshtë.
Në një tjetër përgjim, mësohet tentativa e organizimit të një rezultati të saktë në shifrat 2-2 mes “dallëndysheve” dhe sicilianëve, i cili kuotohej me koeficient 19. Por ky trukim dështon pas tërheqjes së presidentit të Katanias, Pulvirenti, ndonëse nëse prokuroria arrin të konfirmojë pjesëmarrjen në këtë mekanizëm të dy prej futbollistëve të Breshias, emrat e të cilëve mbahen të fshehur, atëherë bardheblutë mund ta harrojnë mundësinë e ripeshkimit për t’u ngjitur automatikisht në Serinë B.
Dhe duke mbetur gjithmonë në materialet dhe dosjet që zgjerohen mbi figurën e trukimeve që kishte marrë përsipër Deli Karri, edhe klubi i Barit duhet të nisë të shqetësohet pas përgjimit të radhës: “Ne bëjmë pallate në një mënyrë, ata në një tjetër”. Sipas hetuesve, ky mesazh mund të përkthehet kështu: Katania i blen ndeshjet, ndërsa Bari i shet.
Dhe, në fund, nuk mungon as Çitadela, një tjetër ekip i rënë në Lega Pro (kategoria e tretë). Sytë e prokurorisë kanë rënë mbi një Katania- Çitadela 2-3, takim i muajit maj, me dyshimin se ka qenë Deli Karri, ai që ka kombinuar fitoren e Çitadelës, për të favorizuar bastet dhe shumat e mëdha që u fituam, duke marrë parasysh koeficientin e madh të këtij rezultati. Hetimet vazhdojnë… /tesheshi.com/
